Интервидение-2025: Қазақстан намысын Әмре мен сегіз жастағы Жасмин қорғайды
«Интервидение-2025» халықаралық байқауында әртүрлі елден келген 23 өнерпаз бақ сынайды, ал миллиондаған көрермен шоу-бағдарламаны тікелей эфирде тамашалайды.
Ұйымдастырушылардың хабарлауынша, трансляция төрт құрлықта жүргізіледі, ал жазбалары қатысушы елдердің басым бөлігінде тәулік ішінде көрсетіледі. El.kz интернет-порталының мәліметінше, байқаудың әлеуетті аудиториясы — 2 миллиардтан астам адам.
Қазақстанның атынан әнші Әмре «Дала таңы» атты әнмен қатысады. Әннің сөзі — ақын Саят Рахымжановтікі. Әмренің шын есімі — Ернар Садырбаев, ол — «Славян базары» байқауының жеңімпазы, әрі «Дарын» мемлекеттік жастар сыйлығының лауреаты.
Әнші сахнаға жалғыз шықпайды, онымен бірге сегіз жастағы Жасмин Қайратқызы, Қазақстан делегациясындағы ең жас қатысушы өнер көрсетеді. Бұл рөлге кастинг кең ауқымда өтті — Жасмин жүздеген үміткердің арасынан таңдалған. Нөмірдің егжей-тегжейі әзірге құпия сақталуда, алайда басқа елдерден келген әріптестері оның әсерлі әрі қуатты екенін айтып үлгерді.
«Бұл ән тек осы жерде емес, барлық қатысушылардың жүрегін жаулап алды. Олар қосылып шырқап жатыр, әннің әуенін айтып жүр. Басты мақсатымыз — бұл әннің Қазақстанда хитке айналуы, отанға деген сүйіспеншілікті жеткізетін патриоттық әндердің көшін бастауы», — деді Қазақстан делегациясының бас продюсері Алтынбек Рахметов «Еуразия Бірінші арнасына» берген сұхбатында.
Байқау қатысушылары тілшілерге өз ойларымен бөлісті.
«Бір-бірімен аса араласпаған халықтар қалай дауыс береді екен — маған бұл қызық. Мұнда 20-дан астам ел бар, және бұл, меніңше, әділ бағалау болады», — деді әнші Әмре.
Қатысушылар қатарында — Бразилиядан келген Лусиану Калазанса мен Таис Надер, олар бірлескен өмірлерінің 11 жылдығын атап өтуде, сондай-ақ Беларусь елінің әншісі Анастасия Кравченко бар. Ол байқауды достық пен мәдени алмасудың алаңы деп есептейді:
«Кішкентай қыздың сахнадағы бейнесі өте әдемі әрі әсерлі, керемет», — деді ол.
«Интервидение-2025» байқауының финалы 20 қыркүйек күні сағат 22:30-да «Еуразия Бірінші арнасында» тікелей эфирде көрсетіледі.
Фото: el.kz
