Катонқарағай мемлекеттік ұлттық табиғи паркінде орнатылған фототұзақтар қар барыстарының сирек сәттерін таспаға түсірді. Бұл туралы ұлттық парктің баспасөз қызметі хабарлады, деп жазады Malim.kz.
Парк мамандарының айтуынша, алдымен камераға аталық қар барысы түскен. Ол фототұзаққа жақындап, камераны иіскеп көргеннен кейін оны басқа жаққа бұрып жіберген.
Алайда екінші фототұзақ ерекше көріністі жазып үлгерген. Кадрдан аналық қар барысы мен оның үш аланын көруге болады.
Аландар анасының жанында ойнап жүрген. Мамандар мұндай көріністі табиғатта кездестіру өте сирек екенін атап өтті.
Ұлттық парк өкілдерінің мәліметінше, бір қар барысы камераны бұрып жатқан сәтте, екінші фототұзақ осы отбасылық көріністі толық түсіріп алған.
Қар барысы – адам көзіне сирек түсетін жыртқыштардың бірі. Сондықтан мұндай кадрлар жануарлардың табиғи ортадағы тіршілігін бақылау үшін ерекше маңызға ие.
