Алатау қаласында төтенше жағдай режимі енгізілді
Алатауда жергілікті ауқымдағы техногендік сипаттағы төтенше жағдай режимі жарияланды, деп хабарлайды Malim.kz қала әкімдігіне сілтеме жасап.
Шешім Алматы облысындағы қоқыс полигонында шыққан ірі өртке байланысты қабылданды. Әкімдіктің мәліметінше, өрт ауқымды аумақты шарпыған.
Қала әкімдігінің айтуынша, төтенше жағдай режимін енгізу барлық қажетті күш пен құралды — өрт сөндірушілерді, құтқарушыларды, арнайы техниканы жұмылдыруға, сондай-ақ барлық қызметтердің жұмысын үйлестіруге мүмкіндік береді.
"Қабылданған шаралар салдарды жою жұмыстарын жеделдетуге бағытталған. Жағдай тұрақты бақылауда. Тұрғындардың өміріне қауіп жоқ. Барлық қызметтер күшейтілген режимде жұмыс істеп жатыр", — делінген әкімдік хабарламасында.
Өрттің шығу себептерін анықтау үшін арнайы тексеріс жүргізілмек. Тұрғындар сабыр сақтап, ресми ұсынымдарға құлақ асуға шақырылды.
Құтқарушылар Алматы облысындағы қатты заттар қоқысы жиналатын полигондағы ірі өртпен үшінші тәулік қатарынан күресіп жатыр.
Фото: IG/akimat.alatau
