Экс-министр Қуандық Бишімбаевтың қолынан қаза тапқан Салтанат Нүкенованың туған ағасы Айтбек Амангелді Бау ресторанында болған оқиғаның суреттерін жариялады, деп хабарлайды Malim.kz.
Оның мұндай қадамға баруына кінәліні қорғаған адвокаттардың жалған мәлімдемелері себеп болғанын да атап өтті. Айтбек Амангелді Бишімбаевтың қорғаушылары болған оқиғаны басқаша жеткізіп, жалған ақпарат бергендеріне наразы.
Адвокаттар оны ұрмады деп отыр. Алайда, бізде әртүрлі бұрыштардан, дененің әр жеріне қайта-қайта соққылар мен тепкілеген сәті түсірілген бейне бар. Медициналық сараптама қорытындысы (бейнедегі скриншоттар) бар, онда сарапшылар тек басынан кем дегенде 13 соққы болған деген қорытындыға келеді, - деп жазды Айтбек Амангелді.
Айта кетейік, Қуандық Бишімбаевтың адвокаты Назкен Кусаинова оның әлі күнге дейін қайғыдан қан жұтып, жазатайым оқиға болғанын алға тартып отырғанын жазған едік.
