ТЖМ: Кіші Алматы және Үлкен Алматы өзенінде шағын қар көшкіні болды

Сел, қар көшкіні жағдайын, мұздақ-мұздық кешендерінің, өзендерінің сел қаупі бар арналарының жай-күйін бағалау мақсатында ҚР ТЖМ «Қазселденқорғау» ММ Қазавиақұтқару тікұшағында Іле Алатауы жотасының орталық бөлігінің бассейндері бойынша Қаскелең өзені бассейнінен Талғар өзеніне дейін аэровизуалды зерттеу жүргізілді.

Алдын ала мәліметтер бойынша, Кіші Алматы және Үлкен Алматы өзені бассейндерінің жоғарғы ағысында шағын қар көшкіні болған.

Сондай-ақ, Талғар өзені алабында қар көшкіні көлемі 300 текше метрге дейін жетті. Барлық қар көшкіні тау беткейінде тоқтады. Айтарлықтай көлемдегі қар көшкіні тіркелген жоқ. Объектілерге қар көшкіні қаупінің төнуі анықталмады.

«Мұздақ көлдер қысқы режимде, мұз қатқан. Көлдегі мұздың жарылғаны байқалмады. Су шығынының шегі қалыпты деңгейде, өзгеріс жоқ. Биік таулы аймақтардағы қардың қалыңдығы 1 метрге дейін жетеді. Көл бөгеттерінде немесе құрылыстардың төменгі ағыстарында көзге көрінетін фильтрация белгілері табылмады. Опырылған немесе көшкіннің ізі анықталмады», - делінген ТЖМ хабарламасында.