Қазақ эстрадасының танымал әншісі Мақпал Жүнісова марқұм жары Заманбек Нұрқаділовпен қарым-қатынасы қалай басталғанын айтып берді. Өнер иесінің сөзінше, ол бастапқыда белгілі саясаткерге ғашық болмаған, тіпті одан сескенген, деп хабарлайды Malim.kz.
Мақпал Жүнісова бұл туралы 2024 жылы "Din Dina Show" бағдарламасында әңгімеледі. Әнші Заманбек Нұрқаділовтің өзіне көңілі ауып, кейін қарым-қатынасқа өзі бастамашы болғанын жеткізді.
"Мен ол кісінің есігін қағып, босағасына барып "Мені алшы" деп жалынған емеспін. Тіпті ол кісіге ғашық та болмағанмын. Жақсы да көрген жоқпын. Зәкең өзі дегенін жасап, қалауын орындады. "Шешең берсе де, бермесе де аламын" деді. Қолында билігі болды. Айналасында біз қорқатын адамдар болды. Алғаш кезде біз ол кісіден қорықтық. Кейін барып, сыйластық орнады. Ал Зәкең орнынан түсіп қалғанда, мен де кетіп қалсам, халық шулайтын еді. "Бастық болғанда қатыны болып еді, биліктен кеткенде Мақпал да кетіп қалды" деп сөгетін еді", – деді өнер иесі.
Мақпал Жүнісова заңды некеге бірден тұрмағанын да жасырмады. Оның айтуынша, екеуі 1991 жылы бірге шаңырақ көтергенімен, ресми түрде тек 1998 жылы некелескен.
"Қиын сәтте жанында қалдым. Екеуміз де әкесіз өстік. Ол да мен сияқты қайыршы болатын. Билік те қолдан кетті. Байлығы да болмады. Ол жақпен өштесетіндей жалғыз Зәкең емес екі әйел алған. 10 әйел да алып жатқандар бар. Мен Зәкеңді ұстағым келсе, бірден АХАТ бөліміне барар едім. Мен бармай қойдым. Жақсы көрсеңіз құжатыз тұрамыз дедім. 1991 жылы шаңырақ көтердік, 1998 жылы заңды некеге тұрдық. Ол уақытқа дейін кететін еркек кетіп қалатын еді. Өзі қайтпай қойды. Кейде ашуланып келгенде, "Ұрпақтарыңыз бар, барыңыз сол жаққа" деп айтамын. "Жоқ, қайтпаймын, саған ашуланып тұрған жоқпын" дейтін. Мен ол кісінің жолын байлаған жоқпын", – деді халық әртісі.
Сонымен қатар Мақпал Жүнісова сахнадағы кәсіби шеберлігімен ғана емес, ашық мінезі, турашылдығы және әзілге жақындығымен де көпшіліктің ықыласына бөленіп келеді. Өнер иесінің түрлі шараларда әріптестеріне қалжың айтып, жұртты күлкіге қарық қылған сәттері де ел есінде. Бұған дейін әншінің Маңғыстауда өткен жеке концерті кезінде ерекше жағдайға тап болғаны, сондай-ақ Қарағандыға жасаған сапарында көңілі қалған жайттарды бөліскені туралы жазған едік. Халық әртісі өміріндегі ең ауыр кезеңдердің бірі жайлы да ашық айтып, әлеуметтік желідегі парақшасында туған ағасы Болатты еске алып, жүрек тебірентер жазба қалдырған болатын. Айта кетейік, Мәдениет және өнер қызметкерлері күніне орай Ақордада өткен салтанатты жиында Президент Қасым-Жомарт Тоқаев бірқатар мәдениет қайраткерін мемлекеттік наградамен марапаттаған еді.
Мақпал Жүнісова туралы
Мақпал Жүнісова – қазақ эстрадасының дамуына үлкен үлес қосқан, ерекше даусымен және өзіндік орындаушылық мәнерімен халық жүрегінен орын алған белгілі әнші. Ол 1963 жылы Қарағанды облысы Қарқаралы ауданына қарасты Теректі ауылында дүниеге келген.
Өнерге бала күнінен жақын болған Мақпал Жүнісова кәсіби сахнадағы алғашқы қадамын 1981 жылы "Қазақконцерт" бірлестігінде солист ретінде бастады. Табиғи таланты, кең тынысты дауысы және сахнадағы еркіндігі оны көп ұзамай елге танымал етті. Әнші халықаралық байқауларда да өнер көрсетіп, қазақ ән өнерін шетелдік сахналарда танытуға атсалысты.
Мақпал Жүнісованың өнердегі еңбегі ерте бағаланды. Ол небәрі 22 жасында "Қазақстанның еңбек сіңірген әртісі" атанса, 31 жасында "Қазақстанның Халық әртісі" құрметті атағына ие болды. Бұл марапаттар оның қазақ мәдениеті мен музыкасына сіңірген еңбегінің айқын дәлелі саналады.
Әнші тек сахнада ғана емес, білім мен ұстаздық саласында да еңбек етті. Ол Әл-Фараби атындағы Қазақ ұлттық университетінде білім алып, кейін жас өнерпаздарға бағыт-бағдар берді. Уақыт өте келе профессор атанып, өнер жолына қадам басқан жастарға тәлімгер болды.
Мақпал Жүнісованың басты ерекшелігі – жүрекке жылы тиетін нәзік әрі сыршыл лирикалық сопрано дауысы. Оның репертуарында халық әндері, романстар, эстрадалық туындылар және джаз бағытындағы шығармалар бар. Осындай жанрлық әртүрлілік әншінің шығармашылық әлемін кеңейтіп, оны бірнеше буын тыңдарманға жақын етті.
Бүгінде Мақпал Жүнісова қазақ эстрадасының примадоннасы, "Орта Азияның бұлбұлы" ретінде танымал. Оның концерттері әлі күнге дейін көрерменнің ерекше ықыласына бөленіп, көпшіліктің қызығушылығын тудырады. Мақпал Жүнісова – қазақ сахнасындағы орны бөлек, шоқтығы биік өнер тұлғаларының бірі.
