"Досаев келмейінше кетпейміз". Белсенділер алаңда түнеуге бел буып отыр

Қаралы митингке келгендер плакат пен тамаққа ақша жинап жатыр. Жанболат Мамай бастаған белсенділер алаңда түнеуге бел буып отыр. Бүгінгі жиын кезінде айтылған талаптар қатарында Алматы әкімі Ерболат Досаев отставкасы туралы да айтылған болатын. Олар өздерінің осы талаптарын айтқаннан кейін аумақта полиция қызметкерлері көбейіп кетті.

Жиналғандар "Досаев халықтың адамы болса, бірге келіп, құран бағыштасын. Келгенше күтеміз" деп жатыр.

Оқи отырыңыздар: "Халық террорист емес". Алматыда қаралы митинг өтіп жатыр

Айта кетейік, бүгін Алматыдағы Тәуелсіздік таңы монументі алдында Қаңтар оқиғасы кезінде қайтыс болғандарды еске алуға арналған қарала митинг өтіп жатыр. Сағат 11-ден бері алаңға 500-ден артық адам жиналған. Олар қаза тапқандарға құран бағыштады. Және осы оқиға салдарынан қамауға алынған азаматтарды босатып, оларды азаптағандарды жазаға тартуды талап етуде.

Естеріңізге сала кетейік, қаңтардағы оқиғалардан кейін Алматы халқы қала әкімі Бақытжан Сағынтаевтың отставкасын талап етіп, петицияға қол жинағаннан кейін президент жарлығымен ол басқа жұмысқа ауысып, орнына Ұлттық Банктің бұрынғы төрағасы Ерболат Досаев тағайындалған. Алайда Досаевтың кандидатурасы тұрғындарға жақпай, оған қарсы петиция жарияланып, 6 ақпан күні оның отставкасын талап еткендер әкімшілікпен келісілген митингке шығып, қала әкімі сайлауын өткізу керегін айтқан.

Жыл басында Маңғыстау облысында газ бағасының қымбаттауы салдарынан жаппай наразылық акциялары басталған. Кейіннен оларды елдің басқа өңірлері қолдап, экономикалық-әлеуметтік мәселелермен қатар, саяси өзгерістер де талап етілген. Елдің бірнеше өңірінде оқ атылған.

• 5 қаңтар күні үкімет отставкаға кетіп, президент газ бағасының түскенін хабарлады. Бұған қарамастан елде қарсылық жалғасып, интернет бұғатталып, билік «террористер шабуылдады» деген ақпарат таратқан. 6 қаңтар күні 2016 жылдан бері ҰҚК басқарып келе жатқан Кәрім Мәсімов «елге сатқындық жасады» деген айыппен ұсталды.
• Оқиға салдарынан құқық қорғау органдары ғимараттары мен мемлекеттік маңызы бар обьектілер өртенген. Билік 20 мың «террорист» шабуылдады деген ақпарат таратқан. Төтенше жағдай 19 қаңтарға дейін жарияланған.
• 7 қаңтар күні президент Қасым-Жомарт Тоқаев «ескертусіз оқ ату» туралы бұйрық бергені туралы айтқан.
• Президент жағдайды тұрақтандыру үшін ҰҚШҰ елдерінен әскери көмек сұрады. Қазақстанға Ресей, Армения, Тәжікстан, Беларусь пен Қырғызстан әскері келді. 13 қаңтар күні оларды кері қайтару басталды.
• Ресми ақпарат бойынша қаңтар оқиғасы салдарынан елде 227 азамат қайтыс болған. Оның ішінде әскерилер мен полицейлер саны – 19. Қайтыс болғандар арасында кәмелеттік жасқа толмаған 3 бала бар.
• Бас прокуратура қайтыс болғандар тізімін жариялаудан бас тартты. Мемлекеттік хатшы Ерлан Қарин бейбіт адамдарға оқ атылмағаны туралы айтты.

Митингтен хабар таратқан Айшолпан КЕРІМ, Ақниет АМАНЖОЛҚЫЗЫ