Ерлан Қарин: Еңбекқорлық пен кәсіби біліктілік құндылықтары - идеологияның маңызды бағыты
Президенттің Атыраудағы отырыста айтқан идеологиялық тезистері нақты қадамдар мен бастамалар арқылы жүзеге асырылып жатыр
Мемлекеттік наградалармен марапатталған азаматтардың елге сіңірген еңбегі Президент Қасым-Жомарт Тоқаевтың Ұлттық құрылтайдың үшінші отырысында айтқан жалпыұлттық құндылықтарымен толық үндеседі.
Біріншіден, мемлекеттік марапатқа ие болған азаматтардың басым бөлігі, яғни 450-ден астам адам – жұмысшы мамандықтарының өкілдері, атап айтқанда шахтерлер, көлік қызметкерлері және басқа да өндіріс саласының мамандары. Сондай-ақ жалпы жұмыс өтілі жүздеген жылдарды құрайтын еңбек династия өкілдеріне де айрықша мән берілді.
Осылайша, Мемлекет басшысы еңбекқорлық пен кәсіби біліктілік құндылықтарын идеологияның маңызды бағыты ретінде дәріптеудің өзекті екеніне назар аударды. Екіншіден, «Қазақстанның Еңбек Ері» жоғары атағын алған төрт адамның үшеуі ғылым мен білім саласының өкілдері екенін ерекше атап өту керек. Мұның бәрі ғылым мен білімді дамытуға, ғалымдар мен ұстаздардың мәртебесін көтеруге қатысты нақты іс-шараларды жоспарлы түрде жүргізіп жатқан Президент саясатының бірізділігін көрсетеді. 137 мұғалім мен 80 ғалымның марапатталуы – мемлекеттік саясаттың озық ойлы қоғамды қалыптастыруға, жасампаздық пен жаңашылдық құндылықтарын насихаттауға бағытталғанын айғақтайды. Үшіншіден, марапатталған азаматтардың арасында Сержан Шәкірат, Нұрлан Өнербай, Секен Тұрысбеков, Майра Мұхамедқызы, Самал Еслямова және т.б. сияқты өнер саласының майталмандары да аз емес.
Сол арқылы Мемлекет басшысы ұлт руханиятын дамытудың және қоғамда жоғары мәдениет қалыптастырудың маңыздылығын паш етті. Президент Ұлттық құрылтайдың отырысында білім, ғылым және мәдениетті қазіргі қоғамның үштағаны деп атады. Жалпы, Президенттің Атыраудағы отырыста айтқан идеологиялық тезистері нақты қадамдар мен бастамалар арқылы жүзеге асырылып жатыр.
Фото: Ақорда
MalimBlocks
