Оралда автобус жүргізушілері наразылық білдірді

Орал қаласының автобус жүргізушілері ереуілге шықты. Олар «Алый парус» ЖШС-де қызмет етеді. 

Жүргізушілер еңбек демалысына уақытылы шыға алмайтынын, сондай-ақ медициналық сақтандыруға, зейнетақы қорына қаржының дер кезінде аударылмауына наразылық білдірді.

Қала әкімдігінен алынған мәліметке қарағанда, таңғы рейс сағат 06.00-де басталса, кешкісін 21.00-де аяқталуға тиіс.

«Алый парус» ЖШС шаһардағы №3, №3к, №14, №17, №35, №38, №51, сондай-ақ қала маңындағы №55, №56 және №77 бағыт бойынша қызмет етеді.

Қалыптасқан мәселені шешу үшін сағат 09.00-де оқиға орнына қала әкімі Мұрат Байменов пен осы салаға жетекшілік ететін орынбасары Азамат Халелов келді.

Кәсіпорын басшылығымен бірге аталған бағыттар бойынша қатынайтын автобустар жүргізушілерімен түсіндіру жұмыстары жүргізілді. Қажетті шаралар алынғаннан кейін сағат 11.00-де мәселе шешіліп, автобустар тиісті бағыттарға оралды.

- Бұл бағыттарда 40 автобус қатынайды. Өткен жылдың 11 айында «Алый парус» ЖШС 898 млн теңге субсидияға өтінім берді. Соның ішінде 545 млн теңге төленді, бұл – сұралған қаржының 60 пайызы. Жүргізушілердің орташа айлық жалақысы – 390 мың теңге. Кәсіпорында 85 адам еңбек етеді, - деп хабарлады ведомстводан.

Фото: Gov.kz