Абай облысының мәдениет, тілдерді дамыту және архив істері басқармасы ақын, ойшыл және ағартушы Абай Құнанбайұлының иелігіндегі мал саны туралы тарихи деректерді жариялады, деп хабарлайды Malim.kz Azattyq Rýhy сайтына сілтеме жасап.
Абай Құнанбайұлын ең алдымен кемеңгер ақын, ойшыл және ағартушы ретінде танимыз. Алайда ол сонымен қатар дәулетті адам, ірі шаруашылық иесі және өз заманының беделді қоғам қайраткері болған.
«Абайдың арғы аталары, соның ішінде әкесі Құнанбай Өскенбайұлы да би, болыс болған, ел ішінде абыройлы, сыйлы адамдар қатарында еді. Осындай ортада өскен Абай жас кезінен-ақ ел ісіне араласып, басқарушылық қабілетін ерте танытқан. 1915 жылы жарық көрген тарихи деректерге сәйкес, Абайдың шаруашылығында 593 жылқы (оның ішінде 108 құлын мен 167 тай-құнан), 51 сиыр, 51 түйе және 1417 қой болған. Бұл жай ғана сандар емес – сол кездегі қазақ қоғамында әлеуметтік-экономикалық мәртебені білдіретін көрсеткіш», – дейді Абай облысының мәдениет басқармасы.
1878 жылы Абай Семей облыстық статистикалық комитетінің толық мүшесі болып қабылданған. Ол өңірдің әлеуметтік-экономикалық, этнографиялық және мәдени жағдайын зерттеуге белсенді қатысқан.
Комитеттің мүшесі болу – тек құрмет емес, белгілі бір білім деңгейі мен азаматтық белсенділікті талап еткен. Абай Құнанбаев бұл міндетті абыроймен атқарып, өңір дамуына елеулі үлес қосқан.
Абайдың шаруашылығы туралы мәліметтер – бұл жай ғана статистика емес. Бұл деректер – ХІХ ғасырдың соңы мен ХХ ғасырдың басындағы қазақ қоғамының құрылымы мен Абай тұлғасын тереңірек түсінуге мүмкіндік беретін тарихи айғақтар.
Фото: Ақорда
Байланысты жаналықтар
MalimBlocks
