Алматыда емхананың екі қызметкері сотталды
Тұлғалардың карточкалық шоттарына еңбекақы мен үстемеақыны есептегені анықталды
Алматыда сот сеніп тапсырылған бөтеннің мүлкін аса ірі мөлшерде иемденгені немесе ысырап еткені үшін екі бухгалтерді кінәлі деп таныды.
«Сеніп тапсырылған бөтеннің мүлкін аса ірі мөлшерде өзінің қызметтік жағдайын пайдалана отырып, алдын ала сөз байласу арқылы бірнеше рет ұрлауға бағытталған қылмыстық ниет бір топ адамды сот алдына алып келді», - деп хабарлады Алматы сотында.
Медеу ауданының №2 аудандық сотында №30 қалалық емхананың бас есепшісі мен бухгалтеріне қатысты қылмыстық іс қаралды.
Сот талқылауы барысында бас бухгалтерлер мен бухгалтерлер 2019 жылдың маусымынан 2023 жылдың қарашасына дейін емханада нақты жұмыс істемеген тұлғалардың карточкалық шоттарына еңбекақы мен үстемеақыны есептегені анықталды.
Осындай әрекеттердің салдарынан мемлекетке 340 миллион теңге көлемінде материалдық шығын келтірілген. Сотта сотталушылар өз кінәларын толық мойындады.
Прокурор айыпталушыларды тиісінше 8 және 7 жарым жылға бас бостандығынан айыруды сұрады.
Сот әйелдердің бұрын сотты болмағанын және жасаған әрекетіне өкінетінін ескерді. Бас есепшіге 7 жарым жыл, ал оның әріптесіне 7 жыл мерзім берілді. Үкім заңды күшіне енген жоқ.
Фото: Ашық дереккөзден
