Алматыда күзетшіні айуандықпен өлтірді деген экс-депутаттың ұлының ісі сотқа жетті

Алматыдағы «Меркур Таун» тұрғын үй кешенінде  күзетшіні аяусыз ұрып-соғып, айуандықпен өлтірді деген бұрынғы депутаттың ұлына қатысты қылмыстық іс Алматы сотының қарауына жіберілді, деп хабарлайды Malim.kz.

Алматы Қылмыстық істер жөніндегі мамандандырылған ауданаралық сотына Қазақстан Республикасы Қылмыстық кодексінің 99-бабы 2-бөлігі 5) тармағы («Аса қатыгездікпен жасалған адам өлтіру») және 147-бабы 5-бөлігі («Адамның жеке өмірі туралы мәліметтерді оның келісімінсіз тарату») бойынша сотқа берілген Т.-ға қатысты қылмыстық іс келіп түсті. Бірінші эпизод бойынша сотталушы 2024 жылдың наурызында Алматыдағы тұрғын үй кешендерінің бірінің күзетшісін өлтірді деп айыпталып отыр, делінген хабарламада.

Сонымен қатар, тергеу сотталушыға өзінің танысы А.-ның қатысуымен түсірілген порнографиялық бейнематериалдарды әлеуметтік желілер арқылы таратты деген айып тағып отыр. Әзірге сот отырысының уақыты белгіленбеген.

Айта кетейік, наурызда жол талғамайтын көлікпен бірнеше рет күзетшіні басып, артынан сабап, басына секірген күдіктінің қылмысы видеоға түсіп қалған еді. Күзетші ауыр жағдайда ауруханаға жеткізілген, алайда есін жимай қайтыс болып кеткен.

Күдіктінің есімі – Асқар Тастандиев. Ол1994-1995 жылдары Жоғары Кеңестің депутаты болған Саламғазы Тастандиевтің ұлы. Ал қайтыс болған марқұмның есімі – Нұрбол Қайыпбаев.

Фото: видеодан кадр