Мәжіліс депутаты Қарақат Әбден бала күтіміне байланысты ақылы демалысты екі жылға дейін ұзартуды ұсынды, деп хабарлайды Malim.kz.
2023 жылы мемлекеттік қызметшілер арасында әйелдердің үлесі 55,7% болды, бірақ олардың арасында басшылық қызметте жүргені бар болғаны 20,3%. Айта кету керек, тәуелсіздік алғалы бері саяси қызметтерді атқарған әйелдердің үлесі ешқашан 15 пайыздан аспаған, - деді ол.
IPU Parline рейтингі бойынша Қазақстан әйелдердің саясаттағы өкілдігі бойынша 183 елдің ішінде небәрі 124-орында.
Қазақстанда аудандық мәслихаттардағы әйелдердің үлесі орта есеппен 21 пайыз. Бірақ бұл көрсеткіш аймаққа байланысты айтарлықтай өзгереді. Мәселен, Түркістан облысында ол небәрі 6,5 пайыз. Квазимемлекеттік секторда негізгі орындарда ер адамдар басым болып қала береді. Облыстық әкімдіктердің басшылығындағы әйелдердің үлесі небәрі 10%, барлық дерлік облыстық басқармаларды ерлер басқарады. Қазақстан әйелдері ел басқару ісіне белсене қатысуға дайын, - деп қоса кетті Қарақат Әбден.
Ол мынадай ұсыныстарын айтты:
1. Гендерлік теңдік бойынша ұлттық мониторинг пен есеп беру жүйесін құру, гендерлік квоталарды іске асыру және әйелдердің басшылық қызметтерге қатысуын арттыру бойынша басқа да мақсаттар. Әрине әйелдерді басшылық қызметке тағайындау тек олардың құзыретіне негізделуі керек.
2. Мемлекеттік қызмет жүйесі мен квазимемлекеттік сектордың барлық деңгейінде әйелдер көшбасшылығының ұлттық бағдарламаларын іске қосу. Мұндай мүмкіндіктерге қол жетімділігі шектеулі аймақтардағы әйелдерге ерекше назар аудару керек.
3. Скандинавия елдерінің тәжірибесіне назар аудара отырып, әйелдер үшін қысқартылған жұмыс уақытын енгізу мүмкіндігін қарастыру. Бұл жұмыс істейтін әйелдердің бала тәрбиесіне көбірек көңіл бөлуіне мүмкіндік береді;
4. Бала тәрбиесінің инфрақұрылымын дамыту, атап айтқанда, тәулік бойы жұмыс істейтін балабақшалар ашу және жұмыс орындарында балалар бөлмелерін құру қажет.
5. Бала күтіміне байланысты ақылы демалысты екі жылға дейін ұзарту.
6. Кемсітушілікпен күресуге және жұмыс орнындағы әйелдерді қорғауға бағытталған құқықтық шараларды күшейту.
Фото: Мәжіліс
