Бүгін үкімет отырысында Президент Қасым-Жомарт Тоқаев қоғамдағы өзекті мәселелерге тоқталып, билік пен халық арасындағы байланысқа басымдық беру керектігін айтты, деп хабарлайды Malim.kz.
Президент ақпараттық жұмыстың уақтылы әрі сапалы жүргізілмеген жағдайында қоғамда дүрбелең тудыратын мәселелердің орын алатынын атап өтті. Осыған байланысты, ол мұқият ойластырылған қоғамдық коммуникация стратегиясын әзірлеу қажеттігін айтты.
Үкімет пен әкімдердің қызметі ашық әрі түсінікті болуы тиіс. Әкімдер мен басшылар халықпен тікелей байланыста жұмыс істеуі қажет, деді Тоқаев.
Мемлекет басшысы «Заң мен тәртіп» қағидасының халық санасында орнығуы үшін құқық бұзушылыққа «мүлдем төзбеушілік» қағидасын қатаң ұстану керектігін ескертті. Бұл бағытта әсіресе аймақ әкімдерінің жауапкершілігі зор екенін айтты. Бірақ бұл шаралардың азаматтардың сеніміне селкеу түсірмеуі керектігіне тоқталды.
«Мәжбүрлеу шаралары болмаса, тәртіп орнату мүмкін емес. Бірақ бұл ретте мемлекет қоғаммен диалог құрып, өз әрекеттерін түсіндіруі қажет», – деді Президент.
Ол сондай-ақ кейбір азаматтардың елді сынауға әуестеніп бара жатқанын, бұл әрекеттердің мемлекеттің имиджіне нұқсан келтіретінін сынға алды.
Кейбір азаматтар елімізді мазақ қылуға әуестеніп барады. Мысалы, өзге елдердің өкілдері жоқ жерден «керемет жетістіктерді, табыстарды» тауып алып, оны шетелге жан-жақты насихаттап жатады. Ал біздің азаматтар, олардың ішінде шоу-бизнес өкілдері, өзін өзі «қоғам белсендісі» санайтын жастар, тіпті, депутаттар да бар, Қазақстанға неше түрлі лақап ат қоятын болды. Бұл енді мүлдем түсініксіз, ақылға сыймайтын нәрсе, деді президент.
Фото: Ақорда
