Қазақстандағы су тасқыны: ТЖМ 7783 адам құтқарылғанын мәлімдеді
Төтенше жағдайлар министрлігі еліміздегі су тасқынына қатысты ахуалды баяндады. Соңғы деректерге сәйкес, азаматтық қорғау қызметтерімен 7783 адам құтқарылып, эвакуацияланды, деп хабарлайды Malim.kz.
ТЖМ ақпаратына сүйенсек, қазіргі уақытта авариялық-құтқару жұмыстарында 6000-нан астам адам, 3000 техника және ТЖМ, Қорғаныс министрлігінен, Ұлттық қауіпсіздік комитетінен, Ұлттық ұланнан 12 әуе кемесі жұмылдырылды. Республикалық жедел штабтың бақылауында 7 облыс тұр. Олар: Ақтөбе, Ақмола, Қостанай, Батыс-Қазақстан, Солтүстік-Қазақстан және Павлодар облыстары.
Су тасқыны басталғалы бері азаматтық қорғаныс қызметтері 7 783 адам, оның ішінде 2 800 баланы қауіпсіз жерлерге жеткізді. Уақытша қоныстану тіректеріне 3 131 адам, оның ішінде 1093 бала құтқарылды және эвакуацияланды. Төтенше жағдайлар министрлігі, Қорғаныс мининистрлігі, Ұлттық қауіпсіздік комитеті және Ұлттық ұланның әуе кемелерімен 644 адам, оның ішінде 236 бала құтқарылды. ТЖМ және жергілікті атқарушы органдардың күштерімен 3,5 млн астам текше метр еріген су сорылды, 300 мыңнан астам қапшық және 45 мың тонна инертті материал төселді, - делінген ресми хабарламада.
Фото: интернеттен
