СҚО-да отбасылық зорлық-зомбылық жасаған 100-ге тарта азамат қамауға алынды
Солтүстік Қазақстан облысында екі ай ішінде отбасында жасалған зорлық-зомбылық әрекетінің 527 факті тіркелген, деп хабарлайды Malim.kz.
Қылмыс жасады деп айыпталған 96 ер азамат қамалған. 60 ер азаматқа ескерту жасалып, 1 адамға айыппұл салынған. Бұл туралы AMANAT партиясы СҚО филиалы жанындағы отбасы және халықты әлеуметтік қорғау мәселелері жөніндегі өңірлік кеңестің отырысында полиция өкілдері айтты.
Осы жылдың 2 айында облыста отбасылық-тұрмыстық қатынастар саласында жасалған қылмыстардың саны шамамен екі есе азайған. Сондай-ақ әйелдерге қатысты зорлық-зомбылық қылмыстар 20% төмендеді, – деді Солтүстік Қазақстан облыстық Полиция департаментінің инспекторы Әсия Әбжанова.
Қазақстанда тұрмыстық зорлық-зомбылық құрбандарына түрлі әлеуметтік көмек ұсынылып келеді. Атап айтқанда, оларға медициналық, психологиялық, экономикалық, жұмыспен қамту және заңдық тұрғыдан қолдау көрсетіледі. 2021 жылдан бері Солтүстік Қазақстанда «Бақытты отбасы» отбасын қолдау қоры жұмыс істеп келеді. Соңғы 4 жылда орталықтың көмегіне 1823 отбасы жүгінген.
Фото: Интернеттен
