Тоқаев: шенеуніктер мен кәсіпкерлер спорт арқылы өздерін жарнамалайды
Президент Қасым-Жомарт Тоқаев құтқарушыларды кәсіби мерекелерімен құттықтап, сонымен қатар спорт саласындағы өзекті мәселелердің біріне тоқталды.
Оның айтуынша, бүгінде спорт федерацияларында жетекшілікті көбіне кәсіпкерлер мен мемлекеттік қызметшілер иеленеді. Алайда олардың көбі бұл лауазымдарды имидж бен жеке пиар құралы ретінде пайдаланып, спорттың дамуына нақты үлес қосып жатқан жоқ.
Мемлекет басшысы Президент Әкімшілігіне осындай жағдайларды реттеп, мұндай тәжірибеге жол бермеуді тапсырды.
Кәсіпкерлер спортты дамытуда мемлекеттік қаржыландыруға көбірек сүйенеді, өз қаражатын салуға асықпайды. Ал мемлекеттік қызметшілер мұндай жоғары лауазымдарды жеке жарнама құралы ретінде қарастырады, спорттың шынайы маңызын түсіне бермейді. Олардың арасында спортшылардың жетістігін өз еңбегі ретінде көрсететіндер де бар. Федерацияны жеке беделін арттыру үшін басқару — бұл мүлдем жол берілмейтін нәрсе, — деді Президент.
Orda.kz басылымының хабарлауынша, еліміздегі бірқатар спорт құрылымдарын жоғары лауазымды тұлғалар мен бизнес өкілдері басқарады.
Мысалы, Жеңіс Қасымбек, Астана қаласының әкімі — Жеңіл атлетика федерациясының вице-президенті; Қуанышбек Есекеев, Президент көмекшісі — Дзюдо федерациясының президенті; Нұрлан Жақыпов, «Самұрық-Қазына» қорының төрағасы — Су спорты түрлері федерациясының президенті; Мәулен Әшімбаев, Сенат төрағасы — Бочча федерациясының басшысы; Наурызбай Байкадамов, сенатор — Гандбол федерациялары қауымдастығының төрағасы; Ержан Біржанов, Қаржы вице-министрі — Триатлон федерациясының президенті.
Айта кетсек, мұндай жағдай бұған дейін де болған. Геннадий Головкин келмей тұрып, Ұлттық Олимпиада комитетін ұзақ жылдар бойы Тимур Құлыбаев басқарған еді. Сол кезеңде ел спортының нәтижелері төмендей бастағанын депутаттар да еске салған болатын. Ол кезде де Парламентте спорт саласында «Ескі Қазақстан» өкілдерінің ықпалы тым күшейіп кеткені айтылған.
Бүгін Тоқаев спортты жеке бедел мен байланыс көрсету құралына айналдыру дәуірі аяқталғанын ашық мәлімдеді.
Фото: Ақорда
