ТЖМ су тасқынына қатысты соңғы деректерді жария етті
Жұмылдырылған күштер мен құралдар қапшықтарды төсеу, қорғау бөгеттерін салу және су басқан аумақтан су сору жұмыстарын жалғастыруда.
ТЖМ өкілі Асқар Шәріп Батыс Қазақстан облысында Жайық өзені су деңгейінің көтерілуі сақталып тұрғанын айтты, деп хабарлайды Malim.kz.
Азаматтық қорғау қызметтері, волонтерлер және тартылған ұйымдар Атырау, Ақтөбе, Батыс Қазақстан, Солтүстік Қазақстан облыстарында су тасқынын жою және халыққа көмек көрсету бойынша жұмыстарын жалғастырып жатыр. Батыс Қазақстан облысында Жайық өзенінде су деңгейінің көтерілуі сақталуда. Жұмылдырылған күштер мен құралдар қапшықтарды төсеу, қорғау бөгеттерін салу және су басқан аумақтан су сору жұмыстарын жалғастыруда. Барлық кезек күттірмейтін шаралар қабылдануда, - деді ол Орталық коммуникациялар қызметіндегі брифингте.
ТЖМ өкілі Атырау облысында Жылыой ауданының Құлсары қаласында су басқан үйлер мен аумақтардан суды сору және судың бағытын бұру, Жайық өзені бойында жағалауды бекіту жұмыстары жүргізіліп жатқанын жеткізді.
Солтүстік Қазақстан облысында да су тасқыны жағдайы тұрақты болғанымен әлі де күрделі. Су басқан үйлер мен аумақтардан суды сору жұмыстары, Есіл өзеніндегі судың деңгейіне мониторинг жалғасуда.
Республика бойынша 26 785 адам өз үйлеріне оралды. 8 795 адам, оның ішінде 3 828 бала эвакуациялау пункттерінде. 4 708 тұрғын үй мен 2 774 аула аумағынан судың бағыты бұрылып, су сорылды, - деді Асқар Шәріп.
Фото: ТЖМ
