Президент Садыр Жапаров «Коммерциялық емес ұйымдар туралы» заңға қол қойды

Жапаров бұған дейін «аталған заңға қол қоймауды өтініп» үкіметтік емес ұйымдар мен олардың шетелдік әріптестері хабарласқанын айтқан. 
«Елімізде жұмыс істейтін үкіметтік емес ұйымдар 30 жыл бойы еш жерде тіркелмей келді. Ешкімге есеп бермеді. Олар банктен есеп-шот ашып, шетелдік донорлардан ақша алып, өз есептері үшін де пайдаланып келді. Бұдан былай олар басқалар сияқты Юстиция министрлігінде тіркелетін болады. Банк есеп-шотын ашады. Енді олар ашық жұмыс істейді. Осыған дейінгідей бей-беректтік болмайды»,-деді Садыр Жапаров.
Президент сөзінше, үкіметтік емес ұйымдар өздерін қудалап, шетел агенті ретінде ұстайтынын айтып, жалған ақпарат таратып жүр. Жапаров «Донорлар осындай қауесетке сеніп қалып, менен заңға қол қоймауды өтінді»,-деп жазды. Ол 30 жыл шетелдік донорлармен жұмыс істеп, ақша алғаны үшін ешкім қудаланбағанын да алға тартты. 
«Мемлекет басшысы ретінде ешқандай қудалау болмайтынына кепілдік беремін. Біз ядролық мемлекет емеспіз. Ғарышқа да ұшқалы жатқан жоқпыз. Біздің мемлекеттің сіздерден, сіздердің донорларыңыздан жасыратын құпиямыз жоқ. Бізде кез келген ақпаратты ашық дереккөзден табуға болады»,- деді президент. 
Қырғызстандық БАҚ жазуынша, бұл заң қабылданған соң шет елден қаржыланыратын ұйымдар «шетелдік өкілдер» деп аталады. Айта кетейік, Ресейде осыған ұқсас заң қабылданып, шетелден қаржыланатын ұйымдар «иноагент» тізіміне енген еді. Мұндай ұйымдар жылына кемінде бір рет жан-жақты тексеруден өтеді. 

Фото: Қырғызстан президентінің баспасөз қызметі