Премьер-министрдің бірінші орынбасары Роман Скляр утилизациялық алымға байланысты мәлімдеме жасады. Ол елдің алдында ашық жұмыс істеп жатқанын, шығарылған шешімдерге байланысты бар жауапкершілікті мойнына алатынын айтады.
«Халықтың алдында ашық жұмыс істеп жатырмын. Егер қате жасасам, жауап беремін. Бірақ бүгінде біз не өнерәкәсібі бар, не өнеркәсібі жоқ ел боламыз. Менің сол үшін жаным ауырады», - депті.
«Боламыз ба, болмаймыз ба?» деген сұрақты ашық қойғысы келген вице-премьер утильалым мәселесіне байыппен қарау керек екенін, егер өндіріс жолға қойылмаса, күні ертең тек мұнайға күніміз қарап қалуы мүмкін екенін ескертіпті.
«Ертең тек мұнаймен күн көре алмаймыз. Сондықтан сіздерді осы мәселеге терең қарауға шақырамын. Барша қабылданған шешімдер үшін жауапкершілікті өз мойныма аламын», - дейді Скляр.
Утильалымға байланысты мәселе біраз уақыттан бері көтеріліп келе жатыр. Қаңтар оқиғасынан кейін бұл тақырып кеңінен қозғалып, үкімет пен белсенділер арасында біраз талқылау болған. Ақыры, Роман Скляр утильалым мөлшерін 50 пайызға азайтатынын айтқан. Бірақ, көптеген белсенділер мен сарапшылар бұл мөлшермен келіспейтінін білдіріп, қоғамда Склярдың отставкасын талап еткен бастамалар көтерілген.
