Тоқаев Ассамблеядағы орынбасарларын ауыстырды
Президент Қасым-Жомарт Тоқаевтың жарлығымен Қазақстан халқы Ассамблеясы төрағасының орынбасарлары өзгерді.
Президент жарлығымен бұл қызметті бұрын атқарған Майя Төлегенқызы Бекбаева мен Закиржан Пирмухамедович Кузиев қызметтерінен босатылды. Олар бұл қызметке 2020 жылдың 11 қарашасында тағайындалған болатын. Сол кезде оларды қызметке президент Тоқаев тағайындағанымен, бұл ақпаратты Ассамблея отырысында экс-президент Нұрсұлтан Назарбаев жеткізген. Айта кетейік, журналист Майя Бекбаеваның бұл орынға келуі біраз талқыға түскен болатын. Себебі осы қызметке келмес бұрын ол Назарбаевқа "Қазақстан әйелдерінің жүрек соғысын жиілетесіз" деп мадақ айтқан болатын. Ал Закиржан Кузиевке келсек, ол мәжілісте бос тұрған депутаттық мандатты алуға үмітті екі адамның бірі. Бүгін ҚХА атынан мәжіліске депутат болатын адамды таңдау үшін Ассамблея мүшелері арасында сайлау өтуі тиіс. Тұңғыш рет ассамбеля бұл орынға екі адамды ұсынып отыр. Бірі - Кузиев, екіншісі - заңгер Виталий Тварионас.
Олардың орнына Наталья Григорьевна Дементьева мен Тауфик Акрамович Каримов тағайындалды.
