АҚШ Дүниежүзілік денсаулық сақтау ұйымынан шығуы мүмкін
Бұл шешімді Трамп инаугурациясында жариялайды деген болжам бар
АҚШ-тың жаңадан сайланған президенті Дональд Трамптың командасы Дүниежүзілік денсаулық сақтау ұйымынан (ДДСҰ) тезірек шығуды талап етіп отыр. Трамптың командасы бұл шешімді 20 қаңтарда, инаугурация күні жариялауды жоспарлап қойған. Бұл туралы Meduza Financial Times-қа сілтеп жазды, деп хабарлайды Malim.kz.
Сарапшылардың айтуынша, АҚШ-тың бұл ұйымнан шығуы ғаламдық денсаулық сақтау саласы үшін қауіпті жағдай. Қазір ДДСҰ-ның ең ірі доноры АҚШ, соңғы жылдары Вашингтон ұйымның бюджетінің шамамен 16%-ын қамтамасыз етіп келген.
Джо Байден әкімшілігінде коронавируспен күрес координаторы болған Ашиш Джа Financial Times-қа берген сұхбатында, Трамп командасының кейбір мүшелері ұйымды Вашингтонның бақылауымен реформалауды жөн көргенін, бірақ ДДСҰ-мен толық байланыс үзу жақтастарының ықпалы басым болғанын айтқан.
Естеріңізге сала кетейік, Трамп 2020 жылдың жазында АҚШ-тың ДДСҰ-дан шығу процесін бастаған еді. Ол ұйымды Қытайдың мүддесіне жұмыс істеді деп айыптап, коронавирусқа қарсы тиісті шараларды қолға алмады деп сынаған болатын. Ресми түрде АҚШ ұйымнан 2021 жылдың шілде айында шығуы керек еді, алайда Джо Байден Трамптың бұл шешімін кері қайтарып тастаған.
Фото: wikipedia.org
