Трамп Нобельсіз қалса, АҚШ Норвегияға қысым көрсетуі мүмкін
Норвегияда Трампқа Бейбітшілік саласындағы Нобель сыйлығы берілмесе, АҚШ-тың қысымынан қауіптенеді, деп хабарлайды Malim.kz DW-ге сілтеме жасап.
Норвегия Нобель комитетіне тікелей саяси қысым жасалмағанымен, «қоғамдық та, жеке де бірнеше науқан жүргізіліп жатқаны анық», – деді Норвегия Нобель институтының директоры Кристиан Берг Харпвикен. Ол Трамптың атын атамады.
Бұған дейін Дональд Трамп «бәрі оның Бейбітшілік саласындағы Нобель сыйлығын алуы тиіс екенін айтып жүр» деген еді. 30 қыркүйекте ол бұл марапатты аламын деп күтпейтінін («Олар оны ештеңе істемеген біреуге береді») мәлімдеп, мұндай шешімді АҚШ үшін «үлкен қорлау» деп атады. Трамп қаңтарда қызметке кіріскеннен бері жеті соғысты тоқтатқанын, соның ішінде Үндістан мен Пәкістан, Мысыр мен Эфиопия, сондай-ақ Сербия мен Косово арасындағы жанжалдарды мысалға келтірді.
Bloomberg дерегінше, Трамптың арнайы өкілі Стив Уиткофф еуропалық саясаткерлермен жеке әңгімелерінде оны Нобель сыйлығына ұсыну мәселесін көтерген. Бұл идеяны АҚШ мемлекеттік хатшысы Марко Рубио да қолдаған. Жуырда Pfizer Inc. компаниясының директоры Альберт Бурла АҚШ-та COVID-19 вакциналарын әзірлеу науқаны аясындағы Трамптың еңбегін «Нобель сыйлығына лайық» деп бағалады. Қыркүйек айының соңында Трампты сыйлыққа ұсыну туралы ұсынысты Украина Жоғарғы Радасы да жасаған.
Агенттіктің мәліметінше, Норвегия парламенті тағайындаған бес адамнан тұратын комитеттің шешімдері 50 жылға құпия сақталады. Сондықтан, егер АҚШ президенті 10 қазанда Нобель сыйлығын алмаса, тек 50 жылдан кейін ғана оның 2025 жылғы қысқа тізімге енген-енбегенін білуге болады.
Фото: Jonathan Ernst/Pool/Reuters
