Ұлыбритания королі III Чарльз ауруханаға түсті, - деп хабарлайды Malim.kz тілшісі The Guardian басылымына сілтеме жасап.
Осыған байланысты алдағы тәулікте жоспарланған барлық іс-шара тоқтатылды.
«Король III Чарльз қатерлі ісіктен жоспарлы ем қабылдап жатыр. Ол емнің «уақытша жанама әсерлерінен» кейін бақылау үшін ауруханаға жатқызылды», - делінген хабарламада.
Букингем сарайының мәліметінше, король қазір Кларенс-хаусқа оралған. 76 жастағы монархтың денсаулығы қатерлі ісік диагнозы жарияланған сәттен бері жіті бақылауда. Былтыр жыл басында оған қатерлі ісіктің белгісіз түрі қойылған. Осыған байланысты III Чарльз үш ай бойы көпшілік алдындағы міндеттерін орындаудан уақытша бас тартқанымен, мемлекеттік істермен айналысып, үкіметтік құжаттармен жұмыс істеп, премьер-министрмен кездесулер өткізді.
Айта кетейік, 5 ақпанда Букингем сарайы III Чарльзға қатерлі ісік диагнозы қойылғанын ресми түрде хабарлаған болатын.
Фото: royal.uk
MalimBlocks
