Ядролық келіссөз: Иран АҚШ-тан санкцияларды алып тастауды талап етті
Иран ядролық бағдарлама бойынша жалғасып жатқан келіссөз барысында АҚШ-тан санкцияларды алып тастауға ресми кепілдік беруін талап етіп отыр. Бұл туралы Тегеранда өткен баспасөз мәслихатында Ислам Республикасы Сыртқы істер министрлігінің ресми өкілі Эсмаил Багаи мәлімдеді.
Біз санкциялардың шынымен жойылатынына кепілдік алғымыз келеді, — деп атап өтті дипломат.
Ол «америкалық тарап осы уақытқа дейін бұл мәселе бойынша нақты міндеттемелерден жалтарып келгенін» қосып өтті.
Багаи сондай-ақ АҚШ-тан ұсыныс алу Иранның автоматты түрде келісімін немесе оны қолайлы деп тану дегенді білдірмейтінін баса айтып, Иранға оның негізгі талаптарына қайшы келетін шарттарды енгізуді міндеттеу әрекеттерінен сақтандырды.
Ол бұл мәлімдемені БҰҰ-ның Атом энергиясы жөніндегі халықаралық агенттігі (МАГАТЭ) Иранның байытылған уран өндірісін 60%-ға арттырып, ядролық қару жасау үшін қажетті 90%-дық шекке жақындағанын анықтаған баяндамасынан екі күн өткен соң жасады.
Багаидың айтуынша, уранды байыту құқығы Тегеранның заңды және логикалық негізделген «қызыл сызықтарының» бірі болып қала береді.
Жексенбі күні Иран СІМ басшысы Аббас Аракчи елдің Оман Сыртқы істер министрі Бадр әл-Бусаиди арқылы жеткізілген АҚШ ұсынысына ресми жауап дайындап жатқанын мәлімдеді.
Багаи атап өткендей, жазбаша құжаттар алмасу — келіссөздегі стандартты тәжірибе және ұсыныстың нұсқасын бірінші болып берген Иран тарапы болды.
Иран СІМ өкілі Тегеран «радикалды және максималистік талаптарды» қамтитын мәтіндерді қабылдамайтынын нақтылады.
Бұл екі тараптың сәуір айының басында жалғасып жатқан келіссөзі басталғалы АҚШ-тың Иранға жасаған алғашқы ресми ұсынысы болды.
Келіссөзге өз елдерінің атынан қатысқан Уиткофф пен Аракчи осы уақытқа дейін Иранның ядролық бағдарламасы бойынша келісімге келуге бағытталған жанама келіссөздің бес раундын өткізді.
Фото: x.com / @IRIMFA_EN
Ең көп оқылған
