Абай облысында жалпы өңірлік тазалық акциясы басталады

Бүгін облыс әкімі Берік Уәли аймақ тұрғындарына арнайы үндеу жасап, жалпыөңірлік тазалық акциясының басталатынын жариялады, - деп хабарлайды Malim.kz тілшісі.  

Аймақ басшысы «Таза Қазақстан» бағдарламасы аясында өтетін тазалық шарасы бір реттік акция емес, жыл бойы жалғасатынын атап өтті.

«Аймақ экономикасы, өнері мен мәдениеті, экологиясы мен тазалығы – баршамызға ортақ. Ал тазалық дегеніміз – жылына бір рет сенбілікке қатысу емес, бұл – біздің өңірде қалыптасуы тиіс үлкен мәдениет. Мемлекет басшысы Қасым-Жомарт Кемелұлы Тоқаев бұл жөнінде «Қалалар мен ауылдардың сәулетті, саябақтар мен ауланың таза болуы, ең алдымен, басқаға емес, өзімізге керек», – деп атап өткен болатын. Туған жеріміздің түлегені, тұрған ортамыздың кіршіксіз болғаны, ең алдымен, өзімізге керек. Облысымыздың тазалығы – әкімдік пен коммуналдық қызметтің ғана емес, әрбір азаматтың, әрбір отбасының жауапкершілігі», - деді облыс әкімі үндеуінде.

Бастама аясында арнайы байқау жарияланады. Тазалық жанашырлары «Үздік аудан», «үздік ауыл», «үздік аула», «үздік университет», «үздік колледж», «үздік мектеп», «үздік балабақша», «үздік көше», «үздік мекеме» номинациялары бойынша марапатталады. Жеңімпаздарға қомақты сыйлықтар тағайындалады.

Облыста абаттандыру, жолдарды, аулаларды, саябақтарды жөндеу, қоғамдық көліктерді жаңарту жұмысы жалғасады. Биыл өңірде 400 шақырым жол жөнделіп, «Ауыл – ел бесігі» бағдарламасы аясында 223 шақырым жол қайта жаңғыртылады. 77 мың түп ағаш егіледі. Семей қаласында 22 ауланы абаттандыру жоспарланған. Оның 11-і сол жағалауда, 11-і оң жағалауда.

Бұдан бөлек облыс орталығында 210 автобус аялдамасы орнатылады. 60 жаңа автобус қала көшелеріне шығады. Шаһар жолдарын тазалау үшін мердігер компаниялар түрлі типтегі 10 арнайы техника сатып алды. Алдағы уақытта да олардың саны көбейеді. Сондай-ақ биыл Семейдегі 10, аудандардағы 100-ге жуық көше жарықтандырылады.

Облыс әкімі өңір ұлы Абайдың 180 жылдығына әзірленіп жатқанын, мерейтойды лайықты деңгейде атап өту керектігін айтты. Аймақ басшысы бизнес өкілдерін, іргелі оқу орындарын, жастар мен еріктілерді, кәсіпорындар мен ұйымдарды игі бастамаға белсенді атсалысуға шақырды.

Фото: Абай облысы әкімдігі ұсынды