Петропавлда Премьер-министр Олжас Бектенов кәсіпкерлермен кездесті, деп хабарлайды Malim.kz.
Жиынға ауыл шаруашылығы мен өнеркәсіп басшыларын қоса алғанда, бизнес саласының 60-қа жуық өкілі қатысты.
Отырыста салық-бюджет реформасы мен оған қатысты өзекті сұрақтар талқыланды. Үкімет басшысы салық жүйесіндегі өзгерістердің бизнесті дамытуға әсерін атап өтті.
Бектенов бюджеттің кіріс бөлігін ұлғайту қажеттігін айтты. Бұрын қабылданған салықтық жеңілдіктер бюджет теңгерімсіздігіне әкелген. Үкімет әлеуметтік шығыстарды қысқартпай, салықтық түзетулер арқылы бюджетті тұрақтандыруды көздейді.
Премьер-министр бюджетке түсетін қосымша кірістер мемлекеттік аппаратты кеңейтуге емес, инфрақұрылым мен бизнес жобаларды дамытуға бағытталатынын мәлімдеді.
Ұлттық экономика вице-министрі Азамат Әмрин сараланған ҚҚС жүйесін таныстырды:
• 16% – базалық мөлшерлеме
• 10% – кейбір салалар үшін
• 0% – агроөнеркәсіп кешені үшін.
Кездесу сұрақ-жауап форматында өтті. СҚО кәсіпкерлер палатасының төрағасы Сергей Домаев ауыл шаруашылығы кәсіпорындарының салықтық реттеу мәселесін көтерді. Ол ҚҚС-тан босату шарасын бүкіл өндіріс тізбегіне қолдану қажеттігін айтты.
Премьер-министр Ұлттық экономика министрлігіне бұл ұсыныстарды жан-жақты қарастырып, ауыл шаруашылығы мен әлеуметтік маңызы бар тауарларға салықтық әкімшілендіруді пысықтауды тапсырды.
Фото: Үкімет
