Олжас Бектенов: бизнеске берілетін ұзақ мерзімді кредиттер жетіспейді
Келесі мәселе, мемлекеттік қаржы институттары мен екінші деңгейлі банктер арасындағы бәсекелестік
Үкімет басшысы Олжас Бектенов экономиканың нақты секторын қаржыландыру саласындағы бірқатар проблеманы көтерді.
Бизнеске берілетін ұзақ мерзімді кредиттер бойынша жетіспеушілік бар. Банктер қысқа мерзімді әрі тәуекелі аз кредит бергенді дұрыс көреді. Ал экономиканың нақты секторына қолжетімді және ұзақ мерзімді қаржы ресурстары қажет. Келесі мәселе, мемлекеттік қаржы институттары мен екінші деңгейлі банктер арасындағы бәсекелестік. Мемлекеттік даму институттары жобаларға негізінен өздері қаржы бөліп келеді, бұл банктердің нақты секторға деген қызығушылығын төмендетеді, — деді Олжас Бектенов Үкімет отырысында.
Премьер-министрдің мәлімдеуінше, экономиканың нақты секторын қаржыландыруда басты рөлді екінші деңгейлі банктер атқаруы тиіс.
Мемлекет басшысы Үкіметтің кеңейтілген отырысында дәл осы мәселені баса айтқан болатын. Үкімет биыл экономиканың нақты секторындағы жобаларды уақтылы қаржыландыруды қамтамасыз ету үшін барлық қажетті шараны қабылдайды. Мемлекеттік кепілдікті қолдану аясын кеңейту, шағын және орта бизнеске арналған кепілдік беру қорын құру, сондай-ақ «Бәйтерек» холдингінің капиталын арттыру жоспарланып отыр. Жалпы, Президент қойған міндеттерді шешу үшін мемлекеттік органдар мен банк секторы үйлесімді әрі нәтижелі жұмыс істеуі керек, — дейді ол.
Фото: Malim.kz
