Солтүстік Қазақстан облысында «Тиолайн» ЖШС және «Обухов тау-кен байыту комбинаты» ЖШС басшыларына қатысты қылмыстық іс сотта қайта қаралады.
СҚО сотының мәліметінше, кәсіпорындардың басшылары Д. В., Д. Д.-ға жер қойнауын өз бетінше пайдалану, заңсыз кәсіпкерлік және пара беруге оқталу бойынша айып тағылған. Бұл қылмыстық істе тағы екі адам — Қ.С., С. Т. — пара беруге және алаяқтық жасауға азғыру бойынша жауап беруде.
Сотталушылар 2021 жылғы сәуірден бастап 2024 жылдың қаңтарына дейін СҚО Тайынша ауданы Обуховка ауылының маңында орналасқан «Обуховское» кен орнында заңсыз пайдалы қазбаларды өндірген. «Тиолайн» ЖШС және «Обухов тау-кен байыту комбинаты» ЖШС басшылары Д. В. және Д. Д. өз бетінше көлемі 1 620 620,16 тонна титан-цирконий кенін өндіріп, мемлекетке 3 трлн теңгеден астам шығын келтірді.
Осы кезеңде Д. В. және Д. Д. пайдалы қазбаларды өндіруге рұқсат беретін лицензиясыз 23 млрд теңгеден астам пайда көрген, олар титан-цирконий және ильменит концентратын сатып, кәсіпкерлікпен заңсыз айналысқан.
2023 жылдың тамызынан қыркүйегіне дейінгі аралықта К.С. және С. Т. құқық қорғау органдарының лауазымды тұлғаларына пара береміз деп Д. В.-ны 225 млн теңге сомасында ақша беруге көндіріп, оның 90 млн теңгесін алдап қалтаға басқан.
Қылмыстық іс бұған дейін алқа билер алқасымен қаралып, олардың шешімімен Д. В., Д. Д., К.С., С. Т. ақталып, сот залынан шығарылды.
СҚО сотының қылмыстық істер бойынша сот алқасының қаулысымен СҚО қылмыстық істер жөніндегі мамандандырылған ауданаралық сотының ақтау үкімі жойылды. Қылмыстық іс сол сотқа қайта басқа құрамда жаңадан сот талқылауына жіберілді.
Сот істі қарау кезінде қылмыстық іс жүргізу заңын бұзып, салдарынан бұл сот үкімінің қаулысына әсер еткен.
Мәселен, сот сұрақ парағын тұжырымдау кезінде тараптардың бәсекелестігі мен тең құқықтылығы қағидатын бұзды және сот алқабилердің сұрақтардың мазмұны бойынша ескертулерін ескермеген, қосымша сұрақ қойғызбаған.
Сот алқабилерге қысым көрсету туралы мән-жайларды анықтау үшін тиісті шаралар қабылдамай, олардың өтінішіне тиісті түрде жауап бермеген.
фото: freepik
Байланысты жаналықтар
MalimBlocks
