Бүгіннен бастап екі қалада субұрқақ іске қосылды
Алматы мен Астананың субұрқақтары күн сайын таңғы 8:00-ден кешкі 23:00-ге дейін жұмыс істейді
1 мамыр – Қазақстан халқының бірлігі күні қарсаңында Астана мен Алматы қалаларында субұрқақтар маусымы ресми түрде ашылды, деп хабарлайды Malim.kz.
Әдеттегідей, елордада дәл осы күні барлық субұрқақ іске қосылды. Астана әкімдігінің хабарлауынша, маусымға дайындық барысында жүйелер консервациядан шығарылып, техникалық жөндеу мен қалпына келтіру жұмыстары жүргізілген. Бүгінде қала аумағында 50-ден астам субұрқақ жұмыс істеп тұр.
Маусымға дайындық кезінде барлық құрылғылар тазартылып, үздіксіз жұмыс істеуі үшін реттеу және тексеру шаралары атқарылды. Жоспарға сәйкес, жаз бойы субұрқақтар елордалықтар мен қонақтарға көрікті көрініс пен салқын самал сыйламақ.
Алматыда да 1 мамырдан бастап субұрқақтар маусымы ашылып, 56 субұрқақ жұмысын бастады. Оның ішінде 11-і – «құрғақ» фонтан саналады. Қаладағы субұрқақтар күн сайын таңғы 8:00-ден кешкі 23:00-ге дейін жұмыс істейді. Тек ауа температурасы +5°C-тан төмендесе ғана уақытша тоқтатылатын болады.
Фото: Pixabay
