Нығматулиннің ұлына қатысты халықаралық тергеу тапсырмасы жолданған

Нұрлан Нығматулиннің ұлы Нұржан Нұрлановқа қатысты қылмыстық іс бойынша халықаралық тергеу тапсырмасы жолданды. Бұл туралы Қаржы мониторингі агенттігі төрағасының орынбасары Жеңіс Елемесов айтты, - деп хабарлайды malim.kz тілшісі ҚазТАГ агенттігіне сілтеме жасап.

"Бізде Алматы қаласы бойынша экономикалық тергеп-тексеру департаментінде рейдерлік дерегі бойынша қылмыстық іс бар. Тергеу жүргізіліп жатыр. Халықаралық тергеу тапсырмасы жолданды. Қазір ешкімге күдікті мәртебесі берілген жоқ. Бірқатар мән-жайды анықтау қажет. (…) Біз оны (Нұрлановты – еск.) күдікті деп таныған жоқпыз, одан куәгер ретінде жауап алынады. Жауап алғаннан кейін және басқа да деректер анықталған соң, заң аясында тиісті баға берілуі мүмкін. (…) Менің білуімше, ол шетелде", – деді Елемесов сәрсенбі күні мәжіліс кулуарында.

Нығматулиндер отбасы

Нұржан Нұрланов 2019 жылғы ақпаннан бастап 2022 жылғы Қаңтар оқиғасына дейін "ҚазМұнайГаз-Аэро" ЖШС-нің бас директоры болған. Бұған дейін, 2018 жылғы қаңтардан бастап, ол "Бәйтерек" ұлттық басқарушы холдингінің басқарма мүшесі болған. Сонымен қатар, оның мансабында квазимемлекеттік секторда басқа да "маңызды" лауазымдар бар.

Нұрлан Нығматулин 2022 жылғы 1 ақпанында Қаңтар оқиғасынан кейін мәжіліс спикері қызметінен кеткен. Ол бұл қызметті 2016 жылдан бастап атқарған. Бұл оның екінші рет спикер болуы еді – бұған дейін ол 2012–2014 жылдары да мәжіліс төрағасы болған. Әр жылдары Президент әкімшілігін басқарған және Қарағанды облысының әкімі қызметін де атқарған.

Ерлан Нығматулин – Нұрлан Нығматулиннің егіз ағасы – мәжіліс пен сенатта депутат болған.

Арғын Нығматулин – олардың үлкен ағасы, Қарағанды облыстық мәслихатының бұрынғы депутаты.

Нығматулиндерге қатысты рейдерлік басып алу, қылмыстық топтармен байланыс және қылмыстық істерді қолдан жасау бойынша бірнеше рет айыптаулар айтылған, дегенмен олар әлі күнге дейін бостандықта.

Осындай айыптаулардың бірін KazTAG 11 наурызда жазған. Онда қарағандылық Zara франшизасының бұрынғы иесі Наталья Овдейчук пен оның күйеуі Рамис Ибрагимов Ерлан Нығматулинді рейдерлікке айыптағаны айтылды. 19 наурызда KazTAG Ибрагимовтің арызы негізінде бопсалау дерегі бойынша қылмыстық іс қозғалғанын хабарлады.

3 наурызда KazTAG Нығматулиндер әулетінің үлкені – Арғын Нығматулиннің сыбайлас жемқорлыққа қарсы қызмет желісі бойынша прокуратура тарапынан іздеуге жарияланғанын жазды. Кейін Бас прокуратура бұл ақпаратты растады – Арғын Нығматулин мемлекет қаражатын жымқыру бойынша күдікке ілінген. 5 наурызда KazTAG Арғын Нығматулиннің іздеу парақшасында оның суреті пайда болғанын жазды – бұған дейін құқық қорғау органдары оны фотосуретсіз жариялағаны үшін сынға ұшыраған. 6 наурызда Бас прокурордың орынбасары Асет Чиндалиев Арғын Нығматулиннің халықаралық іздеуге жарияланғанын растады. Алайда сол күні KazTAG Интерполдың ашық тізімінен оның есімін таба алмағанын жазды. 8 наурызда KazTAG оған тағылған Қылмыстық кодекс бабы туралы хабарлады – оған 12 жылға дейін бас бостандығынан айыру жазасы қаупі төніп тұр. 19 наурызда Арғын Нығматулиннің ісі Бас прокуратураға 2024 жылғы желтоқсанда берілгені белгілі болды. 20 наурызда Сыбайлас жемқорлыққа қарсы қызмет басшысының орынбасары Дархан Құрақбаев Арғын Нығматулиннің елден қылмыстық іс қозғалғанға дейін-ақ кеткенін айтты.

2023 жылғы қарашада "Әділдік жолы" ҚБ атқарушы директоры, бұған дейін бірнеше жыл Сыбайлас жемқорлыққа қарсы қызметте басшылық қызмет атқарған Дидар Смағұлов рейдерлікке қатысты сұраққа жауап бере отырып, сәтті бизнес көзден ғайып болып, соған ұқсас кәсіп Нығматулиндерде пайда болған мысалдарды келтірген.

2025 жылғы 7 қаңтарда Нығматулиндерге қарсы жаңа рейдерлік айыптардан кейін оларды президент Қасым-Жомарт Тоқаевты құлатуға дайындық жасаған болуы мүмкін деген күдік пайда болды. Бұл туралы бизнесмен Қанат Әміркин Нығматулиндермен "қатынасы" туралы айтып, Нұржан Нұрланов – Нұрлан Нығматулиннің үлкен ұлын өзінің "Алатаудорстрой" компаниясын рейдерлік жолмен тартып алу және бопсалау әрекетіне қатысы бар деп айыптағаннан кейін мәлім болды. 1 сәуірде KazTAG Нұржан Нұрлановқа қатысты рейдерлік айыптаулар бойынша қылмыстық іс қозғалғанын жазды. 9 сәуірде KazTAG бұл іс бойынша Нұрлановтың күдікті емес екенін хабарлады. Мәжіліс депутаты бұл ақпаратты түсіндіріп, экс-спикердің ұлының күдікті ретінде танылмауын тиісті органдардың кінәсі деп санады.

10 сәуірде Бас прокурордың орынбасары Ғалымжан Қойгелдиев Нығматулиннің егізі мен ұлына қатысты рейдерлікке байланысты арыздардың қаралып жатқанын айтты.

20 сәуірде KazTAG Қарағанды облысы, Қарқаралыдағы "Тас-Бұлақ" тау-шаңғы қонақүйінің сатылымға қойылғанын хабарлады. Бұрынғы иесі – кәсіпкер Талғат Ақуовтың айтуынша, бұл нысан мәжілістің экс-спикері Нұрлан Нығматулин мен оның ағалары тарапынан рейдерлік жолмен тартып алынған.

Фото: kursiv.media