Қазақстанда отау құрған жұптардың жартысы ажырасқан - министр
2023 жылы елімізде 124 мың жұптың некесі қиылған.
Әділет министрі Ерлан Сәрсембаевтың айтуынша, Қазақстанда 2023 жылы отау құрған 124 мың жұптың жартысына жуығы ажырасқан. Ол бұл көрсеткішті отбасылық-неке қатынастарындағы дағдарыстың салдары деп бағалайды, деп хабарлайды Malim.kz.
Сәрсембаевтың мәліметінше, қазіргі таңда елде жұмыссыз борышкерлерді жұмысқа орналастыру бойынша жүйелі шаралар жүргізілуде. Соңғы жылдары жұмысқа орналастырылған алимент борышкерлерінің саны тұрақты өсіп келеді: 2020 жылы – 1 559, 2021 жылы – 2 224, 2022 жылы – 2 150, 2023 жылы – 4 238 адам. 2024 жылы бұл көрсеткіш 6 232-ге жеткен.
Борышкерлерге қатысты қолданылатын ең соңғы шара – оларды әкімшілік және қылмыстық жауапкершілікке тарту. 2024 жылы 4 642 борышкер әкімшілік жауапқа тартылды. Қылмыстық кодекстің 139-бабы бойынша борышкерлерге қатысты 745 іс тіркеліп, олардың 461-і сотқа жолданған. Нәтижесінде 391 борышкер сотталған, деді ол.
Сәрсембаевтың сөзіне қарағанда, бұл шаралардың өзі алимент төлемеу мәселесін толық шешпейді. Оның пікірінше, балаларды асырауға ниеттің болмауы мен алименттен жалтару – отбасылық құндылықтардың әлсіреуінің айқын көрінісі. Бұған дәлел – тіркелген 61 080 ажырасу фактісі, бұл неке қию санының (124 774) шамамен жартысына тең.
Осыған байланысты отбасы институтын нығайту және балалардың мүдделерін қорғау мақсатында мемлекеттік органдар тарапынан кешенді әрі жүйелі жұмыс атқарылуы қажет деп есептейді ол. Министр алимент төлемдерін өндіру мәселесі ерекше бақылауда екенін де атап өтті.
Фото: Pixabay
