Қуат Хамитов: Депутаттар елдің мәселесін шешуі керек, құттықтайтын уақыт емес
ММА спортшысы Қуат «Найман» Хамитов Мәжіліс депутаты Ардақ Назаровтың Парламент мінберінен анасын құттықтауына қатысты пікір білдірді, деп хабарлайды Malim.kz 1bol.kz-ке сілтеме жасап.
Ол қазіргі жағдайда депутаттардың басты назарын халықтың әлеуметтік-экономикалық мәселелерін шешуге аударуы қажет екенін атап өтті.
«Ардақ аға анасын туған күнімен құттықтап, ел арасында қызу талқылау туғызды. Бірақ дәл қазіргі кезде мұндай әрекеттердің уақыты емес. 2010 жылдан бері халықтың жағдайы айтарлықтай жақсарған жоқ. Жұмыссыздық, қарыз мәселесі әлі күнге дейін бар. Бүгінде ұйықтайтын емес, елдің дамуы үшін күресетін кез. Парламентте халыққа пайдасы бар, нақты жұмыс істейтін адамдар ғана қалуы тиіс. Ал өз үлесін қоса алмайтындар орнын босатқан жөн. Еліміз үшін еңбек етуді тоқтатпауымыз керек», – деді спортшы.
Еске сала кетейік, кеше Мәжіліс отырысында Ардақ Назаров ресми сауалын жолдамас бұрын анасын 70 жасқа толуымен құттықтап, жүрекжарды тілегін жеткізген болатын.
Коллаж: 1bol.kz
