Диплом дауы жалғасуда. Ардақ Назаровты журналист жекпе жекке шақырды.
IMAGE: ҚР Мәжілісі отырысы видеосынан скриншот.
Журналист Гүлбану Әбенова, ҚР мәжілісінің депутаты Ардақ Назаров өзінің оқу-тоқуы мен еңбек жолы туралы айтқан соң, сұрақ тіпті көбейіп кетті дейді. Бұл туралы журналист өзінің Facebook-парақшасында жазды. Гүлбану Әбенованың айтуынша, Ардақ Назаровтың өзі туралы жариялаған мәліметтері қисынға келмейді. Сондықтан оны ашық жекпе жекке шақырып отыр.
"АРДАҚ НАЗАРОВ! Мен, журналист ретінде, сізді ММА ережесі бойынша ашық жекпе-жекке шақырамын. Шығыңыз тікелей эфирге — сол біздің октагонымыз болсын! Сөз жеткілікті. Бос әңгімеден, ертегіден және күмәннен шаршадық. Халыққа көп уәде бердіңіз, көп сөз айттыңыз. Енді сөз емес, іс қажет. Тікелей эфирде менің сұрақтарыма жауап беріңіз: сіздің біліміңіз, еңбек жолыңыз, өмірбаяныңыз — бәрі халық алдында ашық айтылсын. Қолғаптың орнына дипломдарыңызды, студент кезіңізде түскен суреттеріңізді алып келіңіз. Курстастарыңызбен түскен фотоларыңызды көрсетіңіз. Халық бәрін өз көзімен көрсін. Бұл — тек жекпе-жек емес. Бұл — шындық, әділет пен ақиқат үшін айқас. Сіздің жұдырығыңызда халық тұр деп мақтанасыз, ал менің қаламымда халық тұр. Халықты алдамағаныңызды дәлелдеңіз. Егер шынымен ер азамат болсаңыз — октагонға шығып, соны дәлелдеңіз! Мені «тәтешка» деп сылтау айтушы болмаңыз! Еркек болсаңыз — шығыңыз!", -
депті журналист (мәтіні қаз қалпында беріліп отыр).
Еске сала кетсек, Ардақ Назаровқа қоғамның назары ол анасын парламент төрінен құттықтаған кезде ерекше ауған еді. Бұдан кейін ол өзінің оқуы мен еңбек жолына қатысты түсініктеме берген болатын.
