«Тізім қысқартылды». Көкшетаудағы «Жайлы мектеп» туралы жайсыз хабар

Көкшетауда 2 мыңға жуық тұрғыны бар «Бейбітшілік» шағын ауданында мектеп жоқ. Бұл туралы 24 kz телеарнасына сілтеме жасап Malim.kz хабарлайды.   

Аудан балалары қазір 4-5 шақырым жерде орналасқан білім ошақтарына қатынап жүр. Былтыр «Жайлы мектеп» салынады деп жер телімі бөлінгенімен, құрылыс басталмаған.  Мұнда  инфрақұрылымға қатысты мәселелер әлі дұрыс шешілмей келеді. Тіпті балабақша да жоқ дейді жергілікті тұрғындар. 

Қала тұрғыны Мая Болатханованың айтуынша, баласы баратын мектептің арақашықтығы 4-5 шақырымды құрайды. Жаздыгүні байқалмағанмен, қыстыгүні, көктем айларында барып-қайту қиын. Тұрғындар балғындардың қауіпсіздігіне алаңдайды. «Себебі қыстың күндері қаңғысбас ит көбейіп кетеді», – дейді олар. 

Шағынауданда «Жайлы мектеп» не себепті салынбай,  құрылыс тұралап тұрғанын білім басқармасындағылар телеарнаға түсіндіріп баққан.

2024 жылы Үкімет қаулысына сәйкес «Жайлы мектеп» ұлттық жобасына өзгерту енгізілді. Салынатын мектептердің тізімі қысқартылды. Енді ұлттық жобаға енбей қалған білім ошақтарының құрылысы өзге инвестициялық бағдарламалар аясында жүзеге асырылмақ. Мақсатты түрде бөлінген жерге басқа ешқандай нысан салынбайды, - деп мәлімдеді Ақмола облыстық білім басқармасы басшысының орынбасары Валерий Гамазов. 

Фото: видеодан скрин