Ел арасында «жемқорлыққа қойылған ескерткіш» аталып кеткен LRT құрылысы жалғасады. Премьер-министр Әлихан Смайылов құрылысты жалғастыруға қосымша 20 миллиард теңге бөлінгенін айтты.
«Біз бұл жобаның алдағы тағдыры туралы көп талқыладық. Осы жобаны одан әрі дамытудың әртүрлі схемаларын, әртүрлі нұсқаларын зерттей келе, халықаралық сарапшылардың пікірін ескеріп, жобаны жалғастырып, оны біршама оңтайландырылған түрде аяқтаймыз деген шешімге келдік», - деді Смайылов.
Смайылов жобаны аяқтау үшін кезең-кезеңімен қосымша қаражат бөлінеді деп отыр. LRT жобасына ақшаны әкімдік бөледі және толықтай жұмыстарымен айналысады. «Біз бұл қаражатты жұмыстың дұрыс атқарылып жатқанын тексере отырып кезең-кезеңімен бөліп отырамыз», - деді Премьер-министр.
Премьер-министр тапсырма бергеннен кейін бе, қала әкімі Көлгінов тапсырмадан бас тарта алмай қалған секілді. Естеріңізде болса, былтыр Астана әкімі бұл «бетон конструкциялар қаланың көркін кетіріп тұрғаны рас» деген болатын. Тіпті Айдын Рахымбаев оны бұзуды да мойынына алған еді.
2013 жылы экс- президент Назарбаев LRT құрылысы тым қымбатқа түсетінін мәлімдеген. Бірнеше жылдан кейін қытайлық инвесторлар келді.
Ұзақ жылдан бері шу болған жобаға 2015-2019 жылдар аралығында бюджеттен 150 млрд теңге шығындалған. Оның 40,7 млрд − жерді алуға, 124 млрд − құрылыс келісімшартын жасауға, 31,4 млрд несиені жабуға жұмсалған. Соның өзінде жұмыстың бар-жоғы 17%-ы орындалған. «Астана LRT» 2016 жылдың қыркүйек айында құрылыс келісімшартынан бөлек, сырттан негізсіз қарыз алуға өтініш берген. Сол жылдың желтоқсан айында қаржы «Астана банкінің» шотына түскен. Осылайша, Қытай даму банкінен алынған 415,5 млн доллардың тек 86 млн ғана құрылысқа жұмсалған. 257,6 млн «Астана банкінің» салымына салынып, оны алу мүмкіндігі төмендеген» делінген Есеп комитетінің есебінде. Аудиторлардың «ақшаны алу мүмкіндігі төмендеген» деп отырғаны, 2018 жылы «Астана банкі» жабылып қалды да ақша банкте «күйіп» кеткен. Кейін «Проблемалы кредиттер қоры» қаражаттың тек 3,4 млрд теңгесін әзер қайтарып алғанын жариялады.
Ал 2019 жылы шілде айында Қасым-Жомарт Тоқаев жеңіл рельсті көлік құрылысын сынға алып, осы жобаның тиімділігіне сенбейтінін айтқан.
