Бұрынғы сенатор, саясаткер, "Кенесары" қорының президенті Уәлихан Қайсар Путинге үндеу тастады,- деп хабарлайды Malim.kz. Ол Ресей президентінен қазақтың соңғы ханы Кенесарының басын қайтаруды талап етті.
"Құрметті, Ресей федерециясының президенті Владимир Владимирович Путин! Сізге үндеу жасап тұрған Кенесары хан тарихи-мәдени қорының президенті. Қазақтың соңғы ханы Кенесары Қасымовтың басы тым ұзақ уақыт бойы Ресей жерінде жатыр. Мен сізден бұл процесс бойынша жеке шешім қабылдап, ханымыздың басын қайтаруға тікелей атсалысуды өтінемін. Бәріне белгілі, тарих, мәдениет пен өнер қай уақытта да соғыстан тыс дүниелерге жатады. Қазақ халқы ерекше қастерлейтін ханның басын осынша уақыт ұстап отырғандарыңызды қалай түсінуге болады?! Бұлай жасауға болмайды", -дейді Уәлихан Қайсаров.
Айта кету керек, қазақтың бостандығы мен болашағы үшін күрескен ханның бас сүйегі Ресейде жатқаны белгілі. Бірақ нақты қайда жатқаны айтылмайды. Уәлихан Қайсаров бабамыздың басын қайтару мақсатында арнайы Кенесары қорын құрып, осы мақсатпен Лондонға, одан кейін Мәскеуге барып қайтқан. Мәскеуде Дума депутаттарының біразына жолығып, осы мәселені қозғаса да, олар бұл әңгімені қозғаудан саналы түрде бас тартты. Қазір осы мәселемен айналысып, арнайы зерттеу жұмыстарын жасап жатыр. Қайсаров бұл іске бойында намысы бар кез келген Қазақстан азаматы атсалысуы тиіс дейді.
Естеріңізге сала кетейік, Ресей президенті Путин Астанада өтетін ҰҚШҰ саммитіне қатысу үшін Қазақстанға келеді.
Фото: InfoBook.kz
