Соңғы кезде қазнетке кибершабуыл күшейе түсті. Бір айдың ішінде 20 млн-ға жуық кибершабуыл жасалған. Бұл туралы «Мемлекеттік техникалық қызмет» баспасөзі хабарлады.
«Қауіптерді азайту үшін барлық желілік трафикті талдау және әрбір пакетті тексеру жұмыстары жүргізілуде. Киберқалқан зиянды трафик пен зиянды бағдарламаларды сүзу арқылы ішкі және сыртқы периметрлік шабуылдарға төтеп беруде. Бір айдың ішінде 20 млн-ға жуық кибершабуылға тойтарыс берілді», - делінген ұйымның хабарламасында.
Қазақстанның қауіпсіздік жүйесіне кибершабуылдардың үдеуі Президент сайлауымен байланысты болуы мүмкін. «Мемлекеттік техникалық қызмет» осындай болжам жасап отыр.
DDoS шабуылдары үшін бүкіл әлем бойынша таралатын ботнет деп аталатын вирус жұққан компьютерлер мен IoT құрылғыларының желілері қолданылған. Қазіргі уақытта Cybershield күшейтілген режимде жұмыс істейді. Айта кетсек, DDoS шабуылы – бұл белгілі бір интернет-ресурсқа немесе интернет сегментіне ретсіз сұраныстар түріндегі арнайы бағытталған қуатты трафик ағыны. Шабуыл нәтижесінде Интернетке қосылу қиындайды.
Министр Бағдат Мусин мемлекеттік ақпараттық ресурстарға жасалатын кибершабуылдардан қорғану өзінің министрлігіне тиесі емес екенін айтады.
«Бұл сала бойынша біз заң мен стандарттар жазамыз, ал кибершабуыл мен қорғанысқа арналған Ұлттық қауіпсіздік комитетінің арнайы мемлекеттік ұйымы бар, ол – Мемлекеттік техникалық қызмет. Біз жалпы заң талаптарын және басқа да талаптарды бекітеміз, олар сол бойынша жұмыс істейді. Қазір елдегі интернет жүйелеріне ауыртпашылық түсті, оның жылдамдығы баяулады», - дейді Мусин.
