Путин Ресейдің жаңартылған ядролық доктринасын мақұлдады
Құжат жарияланған күні – 19 қарашада күшіне енді.
Путин Ресейдің жаңартылған ядролық доктринасын мақұлдады. Құжатта Ресейдің «әлеуетті жауға қарсы» ядролық тежеу күші бар екені және ядролық қаруды қолдануды «соңғы қадам» деп санайтыны айтылған. Бұл туралы www.rbc.ru жазды.
Ресей президенті Владимир Путин Ресейдің жаңартылған ядролық доктринасын бекітті. Бұл туралы Ресей президентінің жарлығында айтылған. Құжат жарияланған күні – 19 қарашада күшіне енді.
Ресейдің ядролық тежеу саласындағы саясаты туралы бұрынғы жарлық күшін жойды.
Доктринада Ресей мен оның одақтастарын әлеуеті жоғары жаудың агрессиясынан қорғау ең негізгі мемлекеттік басымдық саналатыны көрсетілген. Сондай-ақ, ядролық қаруды қолдану төтенше және мәжбүрлі шара екені де айтылған.
Ресей «ядролық қауіпті азайту үшін барлық қажетті күш-жігерді жұмсап жатқанын», сондай-ақ «әскери қақтығыстарды, соның ішінде ядролық қақтығыстарды» тудыруы мүмкін мемлекеттер арасындағы қарым-қатынастардың шиеленісуіне жол бермеуге тырысатыны айтылған.
Ресей «әлеуетті жауға қарсы» ядролық тежеу күшін қолданады. Доктринаға сүйенсек, «Әлеуеті жоғары жау» деп отырғаны әскери қуаты мығым мемлекеттер мен әскери коалициялар (блоктар мен одақтар).
Блокқа немесе коалицияға кіретін мұндай мемлекеттің Ресейге немесе оның одақтастарына қарсы агрессиясы «осы коалицияның (блоктың, жалпы одақтың) агрессиясы есептеледі».
Доктринада «Ресей мен оның одақтастарына кез келген агрессия болған жағдайда міндетті түрде кек қайтаратыны» жазылған.
Фото: rbc.ru
