Алматы полициясы Темірлан Еңсебектің Instagram парақшасындағы әннің авторларын анықтап жатқанын мәлімдеді, деп хабарлайды vlast.kz сайты.
Енсебек «ұлтаралық араздықты қоздыру белгілері бар материал жариялағаны үшін» тұтқындалып, екі айға қамалған болатын.
Темірлан Еңсебекке қатысты іс сатиралық жарияланымдарға байланысты қозғалған жоқ. Себебі басқаша: ол белгілі бір этнос өкілдеріне нақты түрде қорлаушы сипаттағы ұлтаралық араздықты қоздыру белгілері бар материал жариялады», деп хабарлады қалалық полиция департаментінің баспасөз қызметі, бұл әрекет 174-бап бойынша қылмыстық жауапкершілікке тартуға әкелетінін еске салды.
Полиция сондай-ақ, қазіргі уақытта «Темірлан Еңсебектің Instagram парақшасындағы әннің авторларын анықтаумен айналысып жатқанын» мәлімдеді.
Қазақстан – көпұлтты мемлекет, мұнда түрлі мәдениеттер мен дәстүрлер, сенімдерге сенетін адамдар бейбітшілік пен келісімде өмір сүреді. Осы үйлесімділікке нұқсан келтіретін кез келген әрекет заң шеңберінде тоқтатылатын болады, деп атап өтті полицияның баспасөз қызметі.
Полиция департаменті соңғы екі күнде Темірлан Еңсебекке қолдау көрсету мақсатында жалғыз пикетке шыққан журналистер мен белсенділердің әкімшілік қамауға алынуы туралы пікір білдірді. Полицияның мәлімдемесінде олар «рұқсат етілмеген жалғыз адамдық пикеттерге шықты, бұл көпшілік іс-шараларын өткізу тәртібін бұзу есептеледі», – делінген. Олар осы құқық бұзушылық үшін сот шешімімен әкімшілік жауапкершілікке тартылды.
Сенбі күні Алматыда Темірлан Еңсебек екі айға қамауға алынды. Жұма күні оның үйінде тінту жүргізіліп, кейін ол жауап алуға шақырылып, түнде уақытша ұстау изоляторына қамалды. Полиция оның ұлтаралық араздықты қоздыру күдігімен ұсталғанын хабарлады. Қылмыстық іс қозғауға негіз болған бап бойынша айыпталушыға айыппұл, 2-7 жылға дейін бас бостандығынан шектеу немесе сол мерзімге бас бостандығынан айыру жазасы қарастырылған.
Дүйсенбі күні журналист және белсенді Әсем Жәпішева Темірлан Еңсебекке қолдау білдіру үшін жалғыз пикетке шықты. Ол «Сатира қылмыс емес» деген жазуы бар плакат ұстап, «Бостандық!» деп ұрандады. Бірнеше минуттан кейін оны полиция ұстады. Жәпішева 15 тәулікке әкімшілік қамауға алынды.
Сол сияқты, 15 тәулікке әкімшілік қамауға алынған журналист Руслан Бикетов, ал бүгін «Oyan, Qazaqstan!» қозғалысының белсендісі Ақмарал Жақыбаева жалғыз пикетке шықты. Ол Еңсебекке қолдау білдіргені үшін 15 тәулікке қамалғаны туралы жазуы бар плакат ұстап тұрды. Жарты сағаттан кейін полиция оны да ұстап, Алмалы аудандық полиция бөліміне алып кетті.
Фото: Алмас Қайсар
