Айгүл Иманбаева бұрынғы күйеуінің анасын әлі күнге дейін «мама» деп атайтынын айтты

Қазақстандық актриса, әнші Айгүл Иманбаева бұрынғы күйеуі Сәбит Әбдіхалықовпен ажырасса да, әлі күнге дейін оның ата-анасымен жақсы қарым-қатынаста екенін айтты, деп хабарлайды Malim.kz.

Өнер иесінің сөзінше, ол мұндай қадамға барар алдында ауылдағы ата-енесінің алдынан өткен. Олар да өз кезегінде бұл райынан қайтарғысы келгенімен, әнші шешім қабылданып қойғанын алға тартқан.

Балам алты айлық, оны алып, Сәбиттің ауылына ата-енеме бардым. Он күндей үйде болдым. Бірақ барған бойда ажырасатынымды айттым. «Сіздердің баталарыңызды алып кетейін деп едім. Немереңіз, міне, қай уақытта десеңіз де алып келуге дайынмын, тек тұра алмаймын» деп түсіндірдім. Содан үлкен әжеміз тірі еді. Жылады, «Сәбитпен сөйлесейін, кетпе» деді. Сосын бұл менің шешімім екенін түсіндірдім. Сонымен, он күн үйде болып, үйдің бәрін тазалап, әктеп, бәрімен қоштасып кеттім. Атам-анамның үйіне дейін әкеліп тастады. Анам да қой сойып, қонақ етті. Одан бөлек «құдағидың сыбағасы» деп тағы бір қой сойып, беріп жіберді. Міне, солай үлкендердің рұқсатымен ажырастым. Себебі олардан жаманшылық көрген жоқпын. Асылжан қырқынан шыққанша енем қолымды салқын суға салғызбай мені бақты. Әйел болып жамандайын десем, олардың жамандығын көрмедім. Күні бүгінге дейін араласамын, сәлем саламын. Қазіргі жолдасым «Айгүл, мен бұрынғы жолдасымның анасын «мама» деймін, сен ренжімейсің бе?» деп сұрады. Сол кезде «осы жерден келісіп алайық, мен де бұрынғы жолдасымның анасын «мама» деймін. Аналардың бір-бірінен айырмашылығы жоқ, олар ана ғой» дедім. Сөйтіп, екеуміз келісіп алдық. Әлі күнге дейін солай енемді «мама» деймін, - деді Иманбаева «Мамский әңгіме» подкастында.

Фото: Instagram/aigul_imanbayeva