Миллиард теңге: Қазақстанда 8 мың блогердің салық төлемегені рас па

Қазақстандық блогер Әлішер Елікбаев әлеуметтік желілерде 8 мың блогерге салық комитетінен хаттар келіп жатқанын жеткізді. Оның сөзінше, блогерлер миллиардтаған теңге салық төлемеді деп айыпталып отыр, деп хабарлайды Malim.kz.

Елікбаев желі жұлдыздарына 2022 және 2023 жылдары салық төлемегені туралы хабарлама келгенін алға тартты.  

Мұндай хатты 8 мың адам алды деген қауесет бар. Олардың арасында блогерлер, әзілкештер, вайнерлер, тіпті танымал спортшылар да бар. Сома көлемі әртүрлі. Менің айналамдағылардың арасында рекорд – миллиард теңге. Кейбіріне 400 миллион, кейбіріне 300 миллион теңге берешегі бары ескертілген. Сонда енді толығымен оларды табыссыз қалдыруға шешім шығарылды ма? Әрине, ешкімді аяй алмаймыз. Өйткені барлығымыз әлеуметтік желіде қазақстандықтарды тітіркендіретін өзіміздің ғажайып өмірімізді көрсетеміз, деді ол өзінің Instagram парақшасында.

Елікбаевтың айтуынша, шағын ғана жеке кәсіпкерлігі бар әйеліне 100 миллион салық есептеп берген.

Әйелімнің ЖК-сінде ешқашан ондай қаражат айналымы болмаған, ешқашан. Қомақты салық салынған жігіттердің барлығы төлеуге тиіс салығын бұрын өтеген. Сондықтан таңғалып отырмыз. Қазір көпшілік салық комитетінің есігін тоздырып жүр. Енді әр тиын үшін есеп беру ұсынылып отыр, деп ашуланды ол. 

Елікбаев салық салушылар бағаны түсініксіз түрде, дұрыс емес есептеп салып жатқанын алға тартты.

Миллиард теңге салық салған досымның барлық банк карталары бойынша айналымдарын қараған. Жылжымайтын мүлік пен автокөлік сатып алғанын есептеген. Бірақ бұл адам осы мүлкіне қаражатты 2022-2023 жылы емес, одан ертеректе тауып, жинаған. Ал ол үшін салықты кезінде төлеп те қойған.

Мұның соңы жақсылыққа әкелмейді. Жігіттер кейінгі жылдары ғана табысқа шығып, ол үшін салық төлей бастады. Алайда бұдан кейін олар қайта сөне бастайды. Бұл әркімнің қолма-қол ақша арқылы табысты жасыра бастауына және қара кассаларға ауысуына әкеледі. Осылайша, салық базасы азаяды, деп түйіндеді Әлішер Елікбаев.  

Фото: Pixabay