Украина Қауіпсіздік қызметінің (СБУ) басшысы Василий Малюк мәлімдегендей, 2025 жылдың басынан бері украин күштері Ресей аумағындағы 160 мұнай терминалы мен мұнай өңдеу зауыттарына соққы жасаған, деп хабарлайды Malim.kz.
Малюктің айтуынша, тек қыркүйек пен қазан айларында ғана Украина әскерлері 20 мұнай өндіру және өңдеу нысанын нысанаға алған.
«Олардың ішінде алты мұнай өңдеу зауыты, екі мұнай терминалы, үш мұнай базасы және тоғыз мұнай айдау станциясы бар», – деді ол президент Владимир Зеленскиймен өткен бірлескен баспасөз мәслихатында.
СБУ басшысы бұл шабуылдар Ресей ішкі нарығында мұнай өнімдерінің 20 пайыздық тапшылығын туғызып, мұнай өңдеу қуаттарының 37 пайызының жұмысын тоқтатқанын атап өтті.
«Мұнай өндіру мен мұнай өңдеу — Ресейдің қорғаныс бюджетін 90 пайыз қамтамасыз ететін сала. Бұл – бізді өлтіруге жұмсалып жатқан лас мұнай рубльдері», – деді Малюк.
Бұған дейін BBC-дің орыс қызметі хабарлағандай, 2025 жылдың екінші жартысында Украина Ресейдің мұнай өңдеу зауыттарына қарсы шабуылдарын күшейткен, соның салдарынан елде жанармай тапшылығы мен энергетикалық дағдарыс байқалған.
Фото: Украина президенті
