Биыл "Болашақ" бағдарламасы бойынша тағылымдамадан өте алатын мамандық иелерінің тізімі кеңейтілді. Енді мәдениет және спорт саласының қызметкерлері де "Болашақ" бағдарламасы бойынша тағылымдамадан өте алады.
Жалпы, денсаулық сақтау, мәдениет, спорт саласының қызметкерлері, педагогтар, инженер-техниктер мен мемлекеттік қызметкерлерді ғылыми тағылымдамадан өткізуге биыл 110 стипендия бөлінді. Бұл санаттағы мамандық иелері шетелдік жетекші оқу орындары, зерттеу орталықтары, зерттеу компаниялары, ғылыми өндірістік ұйымдарда ғылыми тағылымдамадан өте алады.
Тағы 500 стипендия жаңа "ғалымдар" санаты бойынша берілмек. Президент Қасым-Жомарт Тоқаев әлемнің жетекші ғылыми орталықтарында 500 ғалымның тағылымдамадан өтуін тапсырған болатын. Бұл тапсырма "Болашақ бағдарламасы бойынша іске асатын болды.
Мәдениет және спорт саласының қызметкерлері тағылымдамадан өте алатын, осы салаға маманданған әлемдегі жетекші оқу орындары көп. Мысалы, New York Film Academy, University of the Arts London, Scuola Musicale di Milano және т.б.
Енді театрдың шығармашылық ұжымының қызметкерлері, әртістер, режиссерлар, өнертанушылар бір жыл бойы өздері шақырту алған оқу орнында біліктілігін арттырып, тәжірибесін шыңдай алады.
Мәдениет және спорт саласының қызметкерлеріне тағылымдамадан өту үшін қойылатын талаптар өзге санаттағы тағылымдамадан өтушілерге қойылатын талаппен бірдей. Ол – кемі үш жылдық жұмыс өтілі, оның ішінде соңғы 12 ай таңдаған мамандығы бойынша жұмыс өтілі болуы тиіс. Сонымен қатар шетелде тағылымдамаға қабылдаушы тараптың шартсыз шақырту және мемлекеттік тіл білу деңгейін көрсететін KazTest сертификатының B1 деңгейінен кем емес нәтижесі болуы шарт.
«Бұрын мәдениет және спорт саласының қызметкерлері «Болашақ» бағдарламасы бойынша тағылымдамадан өтпеген. Елімізде осы салалардың дамуын қолдау мақсатында қажетті жұмыстар жасалды. Енді мәдениет және спорт мамандарында әлемнің беделді шетелдік жоғары оқу орындары мен ұйымдарында өздерінің кәсіби деңгейін арттыру мүмкіндігі бар», – деді "Халықаралық бағдарламалар орталығы" АҚ президентінің міндетін атқарушы Данияр Мұқитанов.
Тағылымдамадан өту үшін кепілге жылжымайтын мүлік қойылмайды. Міндеттемелердің орындалуын қамтамасыз ету үшін соңғы 12 ай ішінде тұрақты табысы бар 50 жасқа дейінгі екі Қазақстан азаматын кепілгер ретінде ұсыну жеткілікті.
"Болашақ" бағдарламасының іріктеу конкурсына қатысу үшін құжаттарды қабылдау 28 қазанға дейін жалғасады.
Фото: Pixabay.com
Байланысты жаналықтар
MalimBlocks
