Қазақстанда дәрі-дәрмек экспортына тыйым салынуы мүмкін
Бұйрық жобасы 6 сәуірге дейін ашық құқықтық актілер порталында талқылау үшін орналастырылған.
Денсаулық сақтау министрлігі елден дәрі-дәрмек шығаруға уақытша тыйым салуды ұсынып отыр.
«Дәрілік қауіпсіздікті, дәрілік препараттарға кең және кедергісіз қолжетімділікті қамтамасыз ету мақсатында, сондай-ақ геосаяси жағдайдың тұрақсыздығынан елдің ішкі нарығында дәрілік заттар мен медициналық бұйымдар тапшылығының ықтимал тәуекелдерін болдырмау үшін ҚР Денсаулық сақтау министрлігі бұйрық жобасын әзірледі, онда Қазақстан Республикасынан 6 ай мерзімге дәрілік заттар мен медициналық бұйымдарды әкетуге тыйым салуды енгізу көзделеді», - делінген министрлік хабарламасында.
Министрлік алты айға Қазақстан аумағынан кез келген нысандағы дәрілік заттарды, оның ішінде фармацевтикалық субстанцияларды, медициналық мақсаттағы бұйымдарды, сондай-ақ оларды өндіруге арналған материалдар мен компоненттерді әкетуге тыйым салуды жоспарлап отыр.
«Тек жеке тапсырысы бойынша жеке пайдалануға арналған медициналық бұйымдар, халықаралық гуманитарлық көмек көрсету үшін жіберілген тауарлар, бөлшек сауда аясында жеке тұтыну үшін әкелінетін және сатып алынған тауарлар, тегін медициналық көмектің кепілдік берілген көлемі және міндетті медициналық сақтандыру шеңберінде алынған дәрілік заттар мен медициналық мақсаттағы бұйымдар, зерттеу және сынау үшін алынған үлгілер, пайдалану орны бойынша денсаулық сақтау ұйымдарында тікелей өндірілген радиофармацевтикалық препараттарға тыйым салынбайды», – делінген хабарламада.
Байланысты жаналықтар
MalimBlocks
