“Барыс” ҚХЛ-дағы кезекті жеңісіне қол жеткізді
Хоккейден “Барыс” клубы ҚХЛ тұрақты чемпионаты аясындағы кездесуде Владивостоктың “Адмиралын” жеңді, деп хабарлайды Malim.kz.
Ойын дүйсенбі күні Астанадағы “Барыс Аренада” өтті.
Бірінші кезеңде есеп ашылған жоқ. Ал екінші кезеңнің 27-минутында Мэйсон Морелли қақпаны дәл көздеп, алаң иелерін алға шығарды. Одан кейін он минут өткен соң Всеволод Логвин нәтижелі әрекетпен көзге түсіп, есепті 2:0-ге жеткізді. Қорытынды есепті Ансар Шайхмедденов қойды — ол 58-минутта шайба соғып, матчты 3:0 есебімен түйіндеді.
Айта кетейік, бұл “Барыстың” қатарынан екінші жеңісі. Бұған дейін астаналықтар “Сібірді” қос камбэкпен 6:4 есебімен тізе бүктірген болатын.
Ал оған дейін Михаил Кравецтің шәкірттері өз айдынында Қазанның “Ақ Барсына” 1:2 есебімен жол берген еді.
Келесі ойында “Барыс” 1 қазанда өз алаңында Ярославльдің “Локомотивін” қабылдайды.
Фото: "Барыс" ХК
