Роналду пенальтиден гол сала алмаса да, Португалия ширек финалға өтті
Оның соққысын словениялық қақпашы Ян Облак қайтарды.
Еуропа чемпионатының 1/8 финалдық кезеңінде Португалия мен Словения құрамалары арасындағы текетірес жанкүйердің біраз жүйкесін жұқартты, деп хабарлайды Malim.kz.
Пенальти сериясында португалиялықтар жеңіске жетіп, (3:0) ширек финалдың жолдамасына иелік етті.
Бұған дейін бір де бір ойында мергендігімен көзге түсе алмай жүрген Криштиану Роналду бұл жолы да еншісіне гол жаза алмады. Негізгі уақытта есеп ашылмағандықтан, матч экстра-таймда жалғасты. Ал 105-минутта Роналду пенальтиден гол сала алмады, оның соққысын словениялық қақпашы Ян Облак қайтарды.
Пенальти сериясында Португалия құрамасының ойыншысы Бернарду Силваның голы шешуші рөл атқарды. Бұл кездесудің басты қаһарманы – Диогу Кошта.
Португалия қақпашысы пенальтиде словениялық ойыншылардың үш соққысын қайтарды.
Енді португалиялықтар 5-інен 6 шілдеге қараған түні Франция құрамасымен кездеседі.
Еуро-2024 топтық кезеңінде Португалия құрамасы алты ұпай еншілеп, F тобында көш бастады. Франция D тобында бес ұпаймен екінші орынға ие болған.
Фото: instagram.com/euro2024
