Аңызға айналған актер 50-ге келді
Кристиан Бэйл айтпақшы, кез келген мықты рөл басқа актерлерге Лео бас тартқан жағдайда ғана «бұйырады».
Фото: Коммерсант
Бүгін Леонардо Ди Каприо деген азамат 50-ге толды.
Ұлы режиссер, кинематография мэтрі Мартин Скорсезенің айтуынша, Лео - гений, кино тілін жан-тәнімен ұғатын сұңғыла актер.
Оскар иесі Том Хэнкстің айтуынша, «Лео – өз буынындағы ең талантты актер».
Образ жасаудың хас шебері Хоакин Феникстің айтуынша, «Лео – бай карьерасымен көпке үлгі, өз замандастарын да қанаттандыратын BIG актер».
Кристиан Бэйл айтпақшы, кез келген мықты рөл басқа актерлерге Лео бас тартқан жағдайда ғана «бұйырады».
Расымен, Лео ерте танылды, ерте есейді. Атағы жер жарған «Титаник» фильмінен соң миллиардтардың есінде Джек Доусон болып қалып қоймай, мықты туынды іздеуге көшті. Коммерциялық кино, Marvel өнімдері, Мелодрама, атыс-шабыс жанрларда төбе көрсетпеді. Супер-қаһармандарды ойнаудан түбегейлі бас тартты.
Актерлік құбыласы – Дэниэл Дэй-Льюис. Сценарий, режиссер, образ таңдауға келгенде кірпияз, іргелі жобаларда ғана төбе көрсетіп келеді. Әр рөлге тыңғылықты дайындықпен келді.
Қиын жол таңдады – қилы образдар сомдады. Меніңше, Лео осы стихиясынан бас тартпайтын да сияқты.
Алтын актер. Леоның замандасы болу мақтаныш. Әрбір адам кәсібін солай сүйсе, әлем де өзгеріп сала берер ме еді.
Қазір Лео атақты Пол Томас Андерсонның жаңа фильмінде рөл сомдамақ. Көрерменге тек тау туынды сыйлайтын Андерсон ағайдың кезекті фильмі ғажап боларына сенімдімін!
Жандос Байділданың фейсбутегі парақшасынан
