Бір топ қазақстандық белгілі кәсіпкерлер азаматтық белсенді Әсия ТӨЛЕСОВАҒА араша түсті. Олар президент Қасым-Жомарт ТОҚАЕВҚА хат жолдады.
«Біз сіздің еститін мемлекет тұжырымдамаңызды қолдаймыз. Ол үшін ойын айтатын азаматтар болу керек. Біз Әсия Төлесованың ісін жеке бақылауыңызға алуыңызды сұраймыз. Әділ әрі ашық сот өтуін қамтамасыз етсеңіз», – делінген ашық хатта.
Қол қойғандардың арасында Болат ӘБІЛОВ, Ораз ЖАНДОСОВ, Асылбек ҚОЖАХМЕТОВ сынды бір кезде оппозицияда болған азаматтар бар. Және Еркін ТӘТІШЕВ, Еркін ТӘТІШЕВ, Нұржан БЕКШЕНОВ, Еркеш ШӘКЕЕВ сынды кәсіпкерлер қол қойған.
10-шы маусымнан бері қамауда отырған Әсия Төлесова қылмыстық кодекстің 378, 380 баптары бойынша айыпталып отыр. Яғни «билік өкілін қорлау» және «билік өкіліне күш қолданды» деген күдікке ілікті. Азаматтық белсенді Төлесованың үстінен алты бірдей полиция қызметкері шағымданып отыр.
2020 жылдың 6 маусым күні билікке қарсы митингіде Әсия Төлесова полицияның қалпағын қағып түсірген болатын. Куәгерлер қоғамдық белсендінің бұл әрекетін полиция ұстаған азаматтарға араша түспек болды деп түсіндірген.
7 шілде күні Алматыдағы Медеу аудандық сотында Төлесоваға қатысты сот отырысы басталып та кетті. Егер судья Зарина МАХАРАДЗЕ күдіктіні кінәлі деп тапса, Төлесова үш жылға дейін сотталуы мүмкін.
Коллаж: МӘЛІМ.КЗ
