АҚШ-тың Қаржы министрлігі Киев пен Вашингтон пайдалы қазбаларды бірлесіп өндіру және Украинаны қалпына келтіру үшін инвестициялық қор құру туралы келісімге қол қойғанын мәлімдеді, деп жазады ВВС.
АҚШ Қаржы министрлігінің сайтында жарияланған баспасөз мәлімдемесінде келісім «Америка халқының Украинаны қорғауға көрсеткен елеулі қаржылық және материалдық қолдауын мойындау үшін» жасалғаны айтылған.
Бұл экономикалық ынтымақтастық Украинаның экономикасын қалпына келтіруді жеделдету үшін бірге жұмыс істеуге мүмкіндік береді, - деді АҚШ Қаржы министрлігі.
Бұл ретте Қаржы министрлігі тараптар «бағдарламаның қалай басқарылатынын түпкілікті бекіту және осы маңызды серіктестікті дамыту» бойынша жұмыс істейтінін түсіндіреді.
Бұған дейін Украинаның тек қана негіздік келісімге қол қоюға дайын екендігі, ал АҚШ техникалық мәліметтерді қамтитын тағы екі қосымшаны жасауды талап еткені хабарланған болатын.
Бұл келісім Ресейге Трамп әкімшілігінің Украинаның ұзақ мерзімді перспективада еркін әрі егемен ел ретінде гүлденуін жақтайтыны туралы нақты сигнал береді, - деді АҚШ Қаржы министрі Скотт Бессент.
Айта кетейік, 24 наурызда АҚШ президенті Дональд Трамп Америка әкімшілігі мен Украина билігі сирек жер элементтері жөніндегі келісім бойынша жұмысты аяқтауға жақын екенін және жақын арада оған қол қоятынын хабарлаған болатын.
Фото: golosameriki.com
